Azərbaycan mətbəxi dünyanın ən zəngin kulinariya ənənələrindən biri hesab olunur. Ölkənin müxtəlif iqlim zonaları, torpaq xüsusiyyətləri, kənd təsərrüfatı məhsulları və tarixi ticarət yolları hər bölgədə fərqli dad mədəniyyətinin formalaşmasına səbəb olub. Buna görə də Azərbaycan mətbəxi yalnız ümummilli yeməklərlə deyil, regional xüsusiyyətləri ilə də seçilir.
Bir bölgədə ət və xəmir yeməkləri üstünlük təşkil edirsə, digər bölgədə düyü, qoz, göyərti və yerli ədviyyatlar ön plana çıxır. Hər rayonun özünəməxsus təamları həmin ərazinin təbiəti, təsərrüfatı və həyat tərzi ilə sıx bağlıdır.
Bəs şimal bölgəsinin məşhur yeməkləri hansılardır?
Şəki
Şəki Azərbaycanın ən qədim kulinariya mərkəzlərindən biridir. Burada hazırlanan piti ölkənin ən məşhur regional yeməklərindən sayılır. Xüsusi saxsı qablarda bişirilən bu yeməyin hazırlanma ənənəsi yüzillərlə qorunub saxlanılıb. Şəkiyə gələn turistlərin ən çox dadmaq istədiyi təamlardan biri məhz pitidir.
Qəbələ və Oğuz
Qəbələ və Oğuz bölgələrinin mətbəxinə meşə məhsulları və qoz bolluğu ciddi təsir göstərib. Bu bölgələrdə qozlu toyuq yeməkləri, müxtəlif plov növləri, göyərti yeməkləri və ev üsulu xəmir təamları geniş yayılıb.
Quba və Qusar
Quba və Qusar mətbəxi əsasən xəmir yeməkləri ilə tanınır. Bölgənin ən məşhur təamları arasında Quba xəngəli, qutab və müxtəlif ət yeməkləri yer alır. Dağ iqlimi və qədim heyvandarlıq ənənələri bu bölgənin mətbəxinin formalaşmasında mühüm rol oynayıb.
Qax və Zaqatala
Qax və Zaqatala bölgələri qoz, fındıq və xəmir yeməkləri ilə məşhurdur. Burada sürhüllü, əriştə yeməkləri, qozlu şirniyyatlar və yerli kətələr geniş yayılıb. Bölgə mətbəxində Azərbaycanla yanaşı avar, saxur və digər xalqların kulinariya təsirləri də hiss olunur.
Mənbə: sia.az
