Quba Rayon Mərkəzi Xəstəxanasının həkim-ümumi cərrahı Gəray Qurbanovun 60 illik yubileyi münasibətilə tədbir keçirilib.
Shimal.News-un məlumatına görə, Gəray Qurbanov artıq 35 ildir ki, xəstəxanada həkim-cərrah kimi fəaliyyət göstərir və bu müddət ərzində yüzlərlə insanın sağlamlığına qovuşmasına töhfə verib.
O, xəstəxana rəhbərliyi tərəfindən Təşəkkürnamə ilə təltif edilib.
Gəray Mirzəhməd oğlu Qurbanov 1965-ci ildə Quba rayonunun Xanagah kəndində anadan olub.
1983-1989-cu illərdə N. Nərimanov adına Azərbaycan Dövlət Tibb İnstitutunun Müalicə-Profilaktika fakültəsində təhsil alıb və fakültəni fərqlənmə diplomu ilə bitirib.
1989-1990-cı illərdə Bakı şəhəri 3 nömrəli Klinik Xəstəxanada (hazırkı Sabunçu Tibb Mərkəzi) ümumi cərrahiyyə üzrə internatura keçib.
1990-cı ildə Quba Rayon Mərkəzi Xəstəxanasına təyinat alıb. 1990-1992-ci illərdə Quba Rayonlararası Onkoloji Dispanserində həkim-onkoloq kimi çalışıb. 1992-1993-cü illərdə Qonaqkənd qəsəbə xəstəxanasında həkim-cərrah və baş həkim, 1994-1999-cu illərdə isə Rustov kənd sahə xəstəxanasının baş həkimi olub.
1999-2008-ci illərdə Quba Rayon Mərkəzi Xəstəxanasının Cərrahiyyə şöbəsində həkim-cərrah kimi fəaliyyət göstərən G.Qurbanov 2008-ci ildən bu günə qədər həmin şöbənin müdiri vəzifəsində çalışır.
O, 15 fevral 2012-ci ildə Azərbaycan Respublikasının Prezidenti yanında Ali Attestasiya Komissiyasının qərarı ilə tibb üzrə fəlsəfə doktoru (PhD) elmi dərəcəsi alıb.
