Bu gün əslən Qubadan olan Qafqazşünas alim, tarix elmləri doktoru, professor Cabbar Xəlilovun dünyasını dəyişdiyi gündür.
Cabbar Xəlilov 1928-ci il mayın 9-da Quba rayonunun Ucbala kəndində anadan olmuşdur. Onun yeniyetməlik illəri II Dünya müharibəsinin davam etdiyi bir dövrə təsadüf edir. 1946-cı ildə Quba Pedaqoji məktəbinə qəbul olunmuş, 1947-ci ildə həmin məktəbdə təhsilini başa vuraraq elə həmin il Azərbaycan Dövlət Universitetinin tarix fakültəsinin əyani şöbəsinə daxil olmuşdur.
Onun arxeoloji çöl-tədqiqat işlərinə ilk dəfə cəlb olunması 1950-ci ilə təsadüf edir. 1957-ci ildə Xəlilov ilk dəfə arxeoloji ekspedisiya rəisi kimi fəaliyyətə başlamışdır. Həmin ildə o, Azərbaycan tarixi muzeyinin ekspedisiyasına başçılıq edərək Xızı rayonunun Altıağac kəndi yaxınlığında, orta əsr Dərəzarat və başqa abidələrdə arxeoloji tədqiqat işləri aparmışdır.
Sonralar onun rəhbərliyi altında Azərbaycan EA Tarix, habelə Arxeologiya və etnoqrafıya institutlarının Şamaxı (1958-1975-ci illər), Gəncə-Qazax (1981-1982-ci illər), Quba-Xaçmaz (1983-1994-cü illər) kimi iri ekspedisiyaları fəaliyyət göstərmişdir.
Görkəmli alim uzun sürən xəstəlikdən sonra 1994-cü il martın 29-da ömrünün 66-cı yaşında vəfat etmişdir.
