Azərbaycanda yaşayan azsaylı xalqların nümayəndələrinin maraqlı adət-ənənələri və fərqli mətbəxi mövcuddur. Bu xalqlardan biri də Qax rayonunda yaşayan gürcülərdir.
Bizim.Media-nın məlumatına görə, Qax rayonunda yaşayan gürcülər ildə 2 dəfə qəbirləri ziyarət edərək adətlərini yerinə yetirirlər.
Qaxbaş kənd sakini Nanuli Babacanaşvilinin sözlərinə görə, məzar başına gedəndə onlar evdən ən yaxşı təamları apararlar, şamlar yandırıb ölünün adına duz salarlar:
"Bu bizə ata-babalarımızdan qalan dini adət-ənənədir. Biz başqa bayramlarda məzarları ziyarət etmərik. Ancaq ildə 2 dəfə Pasxa bayramından sonra edərik. Həmin gün hamı öz ölülərini ziyarət edər, adına duz salar, şamlar yandırılar. Hətta öz ölülərini ziyarət etmək üçün Gürcüstanda yaşayan qohumlarımız da həmin günü məzarları ziyarət etmək üçün gələrlər.
Bundan başqa evdə bişirilən ən gözəl yeməklərimizi qəbir üstə gətirərik və məzar üzərinə süfrə salaraq düzərik. Daha sonra şam ağacında olan yapışqan halında bir maddədən "saqmel" adında qarışım hazırlayarıq.
Həmin sarı rəngli yapışqan yığılır, qurudulur, ovulur və istifadə olunur. Bir çömçədə köz götürərik və bütün qohum-əqraba həmin saqmeldən köz üzərinə tökərək "Allah rəhmət eləsin!”- deyərlər. Sonda bütün ailə toplaşıb həmin yeməkləri qəbristanlıqda yeyərik", – deyə Nanuli əlavə edib.
Qaxın gürcüləri bu adətləri qoruyub saxlamağa çalışacaqlarını bildiriblər.
