Bu gün Azərbaycanın Milli Qəhrəmanı, Qarabağ müharibəsi şəhidi Koroğlu Rəhimovun anım günüdür.
Shimal.News xatırladır ki, 33 il öncə Xocalı faciəsindən sonra Koroğlu könüllü olaraq Azərbaycan Silahlı Qüvvələrinin sıralarına yazılıb. Sonra motoatıcı bölüyə hərbi komandir təyin olunub. 13 iyunda bölük Goranboyun Buzluq, Çartaz, Erkəç kəndlərini yaraqlılardan azad edib. Koroğlu təkbaşına 5 düşməni məhv edib.
1992-ci il iyulun 3-çü Koroğlunun bölüyü Ağdərə istiqamətində hücuma keçir. O, yaxınlığındakı 3-cü savxozu ermənilərdən azad edir. Qanlı döyüşlərin birində 38 yaşlı Koroğlu Rəhimov şəhid olur və Bakıda yerləşən Şəhidlər xiyabanında dəfn edilib.
Azərbaycan Respublikası Prezidenti Heydər Əliyevin 16 sentyabr 1994-cü il tarixli, 203 nömrəli fərmanına əsasən Azərbaycan Respublikasının suverenliyinin və ərazi bütövlüyün qorunmasında, Azərbaycan torpaqlarının erməni işğalçılarından müdafiə edilməsində gedən döyüşlərdə qəhrəmanlıqla vuruşaraq göstərdiyi şəxsi igidlik və şücaətə, öz müqəddəs əsgəri və xidməti borclarının şərəflə yerinə yetirilməsində göstərdiyi misilsiz xidmətlərə görə leytenant Rəhimov Koroğlu İsmayıl oğlu ölümündən sonra "Azərbaycanın Milli Qəhrəmanı" adına layiq görülüb.
Koroğlu İsmayıl oğlu Rəhimov 31 oktyabr 1953-cü ildə Oğuz rayonunun Xaçmaz kəndində doğulub. 1961-ci ildə ailəsi ilə birlikdə ata-baba yurdları olan Qərbi Azərbaycanın Zəngibasar mahalına, Sarıcalar kəndinə köçüb.
1979-cu ildə əmisi qızı Aybəniz adlı xanımla ailə həyatı qurub. Onun Rəşad, Samir və Ülviyyə adlı övladları var. Nəvələrindən biri babasının adını yaşadır.
Bakının Nərimanov rayonunda küçələrdən birinə "Koroğlu Rəhimov küçəsi" adı verilib və bu küçədə onun büstü qoyulub. Xaçmaz kəndində yerləşən 3№-li körpələr evi, Oğuz şəhərində küçə Koroğlu Rəhimovun adını daşıyır.
