Bu gün Azərbaycanda Novruz bayramı qeyd olunur.
Şimal bölgəsinin özünəməxsus adət-ənənələri mövcuddur. Qubanın Qrız, Haput, Xınalıq, Buduq kəndlərində Novruzdan əvvəl evlərdə qədim səməni umacı bişirilir, qohumlara paylanılır. Qrız kəndində Novruzun gəlişi ilə əlaqədar torpaq qazılır və dar keçid hazırlanır. Keçidin düz ortasına boyanmış yumurta basdırılır. Dar keçiddən keçən şəxs yumurtanı əzməyib keçsə, ilin onun üçün uğurlu olacağını hesab edirlər. Keçiddən keçmək istəyənlər torpağı qazana bayram hədiyyələri də gətirirlər. Buduq kəndində bayram axşamı mütləq əriştəli plov bişirilir.
Novruz bayramından 13 gün sonra Qubada “Səməniatdı” mərasimi keçirilir. Xanımlar əllərində səmənilərlə Qudyalçayın sahilinə gəlib, niyyət edib, əllərindəki səməniləri suya atırlar. Səmənini atıb, niyyət edirlər ki, gələn Novruza kimi arzuları yerinə yetsin. Həmçinin gələn ilin daha bərəkətli olması üçün səmənini suya yox, evin damına atırlar.
Novruz bayramı, həmçinin Qırmızı qəsəbədə də qeyd olunur. Dağ yəhudiləri almanı bala batırıb yeməklə yeni ilin, yeni günün uğurlu keçməsini arzulayırlar, bir-birini təbrik edir, Qubada yaşayan müsəlman dostlarının evinə qonaq gedib, bayramlaşırlar.
