Aprelin 6-da Xaçmaz rayonunun İstisu qəsəbəsi ərazisindən keçən və çökmə baş verən yolun bərpasına başlanılıb.
Bizim.Media-nın məlumatına görə, bu barədə Azərbaycan Avtomobil Yolları Dövlət Agentliyinin Xaçmazdakı 4 saylı Yol İstismar İdarəsindən bildirilib.
Qurumdan verilən məlumata əsasən, sel sularının zədələdiyi ərazidə dağılan boruların sökülməsi və təmizləmə işlərinə start verilib.
Bildirilib ki, təmizləmə işləri başa çatdıqdan sonra yeni suötürücü borular quraşdırılacaq və yolun üst hissəsində bərpa işləri aparılacaq.
Bərpa işlərinin 10-15 gün ərzində tamamlanması planlaşdırılır.
