Əkrəm Cəfər 5 may 1905-ci ildə indiki İsmayıllı rayonunun Lahıc qəsəbəsində anadan olub.
O, ilk təhsilini mollaxanada aldıqdan sonra yeni üsullu məktəbdə oxuyub. Əkrəm ərəb, fars və türk dillərinə yiyələnib. 1920-ci ildə Darülmüəlliminə (Bakı Pedaqoji Məktəb) daxil olub. Burada o, Hüseyn Cavidin sevimli tələbəsinə çevrilib. Hüseyn Cavid Əkrəm Cəfərin ədəbiyyat müəllimi olub. Cəfər o dövrdə Mirzə Ələkbər Sabirin təsiri ilə şeirlər yazıb. Cəfərin ilk şeirləri Bakı Darülmüəllimində təhsil aldığı illərdə mətbuatda çap olunmağa başlayıb.
Əkrəm Cəfər Pedaqoji məktəbi bitirdikdən sonra dörd il Lənkəran və Qazaxda ədəbiyyat müəllimi işləyib.
Əkrəm Cəfər 1929-1932-ci illərdə Moskva Dövlət Universitetinin filologiya fakültəsində təhsil almışdır. Həmin zaman Əkrəm Cəfər Kremldə də çalışıb. Orada işləyərkən o, “Bolşaya Sovetskaya Ensiklopediya”nın müxtəlif cildlərində türk dünyasının böyük şəxsiyyətləri barədə məqalələrini dərc edib, həmçinin “Azərbaycan Sovet Ensiklopediyası”nın aparıcı müəlliflərindən biri olub. 1937-1939-cu illərdə isə Azərbaycan Dövlət Pedaqoji İnstitutunda kafedra müdiri vəzifəsində çalışıb.
5 sentyabr 1942-ci ildə Əkrəm Cavad Hüseyn Cavid, Əhməd Cavad, Mikayıl Müşfiqlə əlaqələrinə görə həbs olunaraq Rusiyanın Kuybışev şəhərindəki həbs düşərgəsinə göndərilib. Daha sonra oradan Krıma köçürülmüş, 1949-cu ilə qədər həbsdə olmuşdur. Həbsdən azad edildikdən bir müddət sonra o, yenidən Türkmənistanın Mərv vilayətinə sürgün edilmişdir.
Əkrəm Cavad 1954-cü ildə bəraət alaraq, Azərbaycana qayıtmışdır, indiki Azərbaycan Dövlət Pedaqoji Universiteti və Bakı Dövlət Universitetində “Qədim türk yazılı abidələri” fənnindən dərs demişdir.
Əkrəm Cəfər 1961-1991-ci illərdə AMEA-nın Şərqşünaslıq İnstitutunda çalışır. Burada alim 1977-ci ildə “Əruzun nəzəri əsasları və Azərbaycan əruzu” adlı əsərini yaradır. Bu əsərlə və 250-dən artıq məqaləsi ilə o, Azərbaycanda milli əruz (şeir ölçülərindən bəhs edən elm) məktəbinin və müqayisəli əruzşünaslıq elminin əsasını qoyur.
Əkrəm Cəfər 18 avqust 1991-ci ildə Bakıda vəfat edib. O, II Fəxri xiyabanda dəfn olunub.
İstinad edilən mənbələr:
