Bu gün Azərbaycan məhkəmə sistemində uzun illər prinsipial mövqeyi, peşəkar fəaliyyəti və qanunun aliliyinə bağlılığı ilə tanınmış hakim Vəkil Şükürovun doğum günüdür. Onun vəfatından isə 6 il ötür.
Shimal.News xəbər verir ki,
Quba rayonunun Cimi kəndində dünyaya gələn Vəkil Şükürovun həyat yolu ağır və çətin şəraitdə başlayıb. Erkən yaşlarında atasını itirməsi ailənin bütün yükünü anasının üzərinə qoyub. Maddi sıxıntılar içində keçən uşaqlıq illəri onun xarakterinin formalaşmasına, iradəli və dözümlü insan kimi yetişməsinə ciddi təsir göstərib.
Gənc yaşlarından əmək fəaliyyətinə başlayan Vəkil Şükürov müxtəlif sahələrdə çalışaraq ailəsinə dəstək olub. Zavodda işlədiyi illərdə ictimai fəaliyyətə maraq göstərib, bir müddət rayon məhkəməsində xalq iclasçısı kimi iştirak edib. Məhkəmə proseslərini yaxından izləməsi onda hüquq sahəsinə böyük maraq yaradıb.
Ali təhsil almaq arzusu isə onun həyatındakı ən çətin mərhələlərdən biri olub. Maddi imkansızlıq səbəbindən bir neçə dəfə universitetə qəbul ola bilməsə də, məqsədindən geri dönməyib. Gecələr hazırlaşıb, işləyə-işləyə təhsilini davam etdirib. 1963-cü ildə texnikuma qəbul olunaraq oranı fərqlənmə diplomu ilə bitirib. Uzun illərin mübarizəsindən sonra 28 yaşında Azərbaycan Dövlət Universitetinin hüquq fakültəsinə qəbul olunub.
Əmək fəaliyyətinə fəhlə kimi başlayan Vəkil Şükürov sonradan usta, mühəndis-texnoloq vəzifələrinə qədər yüksəlib. Hüquq təhsilini başa vurduqdan sonra isə məhkəmə sistemində fəaliyyətə başlayaraq 1976-cı ildə Lerik rayonunda xalq hakimi təyin olunub. Sonrakı illərdə Şamaxı rayon məhkəməsinin sədri, Şamxor (indiki Şəmkir) rayonunda hakim, daha sonra isə Azərbaycan SSR Ali Məhkəməsində hakim kimi çalışıb.
O, xüsusilə ağır cinayətlər və rezonans doğuran işlər üzrə çıxardığı qərarlarla tanınıb. Balakən və Nardaran hadisələri ilə bağlı məhkəmə proseslərində qanunun aliliyinə söykənən prinsipial mövqeyi ilə yadda qalıb.
Vəkil Şükürov müəllif kimi də fəaliyyət göstərib. Onun "Taleyim mənim" kitabında həyat yolu, çətinliklərlə dolu mübarizəsi və hakimlik fəaliyyəti əks olunub. "Qara kəmər əməliyyatı" əsəri isə hüquq-mühafizə və məhkəmə təcrübəsinə dair diqqət çəkən publisistik nümunələrdən hesab olunur.
Yoxsul kənd həyatından başlayaraq Azərbaycan məhkəmə sisteminin yüksək pillələrinə qədər yüksələn Vəkil Şükürov peşəkar hakim, prinsipial hüquqşünas və yüksək mənəvi keyfiyyətlərə malik insan kimi xatırlanır. Bu gün onun xatirəsi doğmaları və onu tanıyanlar tərəfindən ehtiramla yad edilir.
