Bu gün Azərbaycan xalqı müasir dövlətçiliyimizin memarı, Ümummilli Lider Heydər Əliyevin əziz xatirəsini ehtiramla anır. 22 il əvvəl – 2003-cü il dekabrın 12-də Heydər Əliyev ABŞ-nin Klivlend klinikasında 80 yaşında vəfat edib və dekabrın 15-də Bakıda, Birinci Fəxri xiyabanda böyük izdihamla dəfn olunub.
Heydər Əliyev 10 may 1923-cü ildə Naxçıvan şəhərində anadan olub. O, 1939-cu ildə Naxçıvan Pedaqoji Texnikumunu bitirdikdən sonra Bakıdakı indiki Azərbaycan Dövlət Neft və Sənaye Universitetində təhsil almağa başlayıb. Lakin İkinci Dünya müharibəsinin başlanması səbəbilə təhsilini yarımçıq qoymağa məcbur olub.
Cəmi 21 yaşında təhlükəsizlik orqanlarında çalışmağa başlayan Heydər Əliyev qısa müddətdə peşəkarlığı, intellekti və idarəçilik qabiliyyəti ilə seçilib. 1967-ci ildə Azərbaycan SSR Nazirlər Soveti yanında Dövlət Təhlükəsizliyi Komitəsinin sədri vəzifəsinə təyin olunması onun dövlət idarəçiliyində mühüm mərhələnin başlanğıcı sayılır.
1969-cu ildə Heydər Əliyevin Azərbaycan Kommunist Partiyası Mərkəzi Komitəsinin birinci katibi seçilməsi respublikanın ictimai-siyasi həyatında dönüş nöqtəsi oldu. Onun rəhbərliyi illərində Azərbaycanın sənayesi sürətlə inkişaf etdi, kənd təsərrüfatında ciddi irəliləyiş əldə olundu, infrastruktur layihələri genişləndi. O dövrdə ölkə ittifaq miqyasında nüfuz qazandı.
1987-ci ildə Heydər Əliyev Sovet İttifaqı Kommunist Partiyası Mərkəzi Komitəsinin sonuncu Baş katibi Mixail Qorbaçovun siyasətinə etiraz olaraq yüksək vəzifələrdən istefa verdi. 1990-cı ilin Qara Yanvar faciəsindən sonra o, Azərbaycanın Moskvadakı Daimi Nümayəndəliyinə gələrək xalqın kənardan gizlədilən həqiqətini dünyaya çatdırdı. Bu addım həm siyasi, həm də tarixi baxımdan xüsusi cəsarət nümunəsi kimi yadda qaldı.
1991-ci ildə Naxçıvana qayıdan Heydər Əliyev muxtar respublikanın Ali Məclisinə rəhbərlik etdi, burada dövlətçilik ənənələrinin qorunması, milli atributların bərpası və Azərbaycanın müstəqilliyinə dəstək istiqamətində mühüm qərarlar verdi.
1993-cü ildə ölkədə yaranan ağır siyasi böhran fonunda xalqın tələbi ilə Bakıya dəvət olunan Heydər Əliyev 3 oktyabr 1993 və 11 oktyabr 1998-ci il seçkilərində ümumxalq səsverməsi ilə Azərbaycan Respublikasının Prezidenti seçildi. Onun rəhbərliyi ilə ölkədə xaosun qarşısı alındı, vətəndaş müharibəsi təhlükəsi aradan qaldırıldı, sabitlik və inkişaf dövrü başlandı.
Heydər Əliyev Azərbaycanın beynəlxalq aləmdə nüfuzunun yüksəlməsinə, iqtisadiyyatın neft müqavilələri vasitəsilə dünya bazarlarına inteqrasiyasına, güclü ordu quruculuğuna və hüquqi dövlətin formalaşdırılmasına misilsiz töhfələr verdi. "Əsrin müqaviləsi"nin imzalanması, Bakı–Tbilisi–Ceyhan neft kəməri layihəsinin əsasının qoyulması, çoxşaxəli diplomatik siyasət bu dövrün mühüm nailiyyətlərindəndir.
Bu gün də Heydər Əliyevin siyasi kursu və dövlətçilik ideyaları müasir Azərbaycanın inkişafında əsas istiqamət kimi davam etdirilir. Ümummilli Liderin xatirəsi Azərbaycan xalqı tərəfindən ehtiramla yad olunur.
