Əmir Gülbala oğlu Mustafayev 1936-cı ildə Qusar rayonunun Xuluq kəndində (digər mənbələrdə Qusar şəhərində) anadan olub.
Əmir Mustafayev Qusarda 4 saylı orta məktəbi bitirmiş, 1953-1958-ci illərdə indiki BDU-nun filologiya fakültəsində təhsil almışdır. O, 1958-ci ildə Moskva Mərkəzi Komsomol Məktəbində təhsilini davam etdirmişdir.
Əmir Mustafayev 1957-1969-cu illərdə “Azərbaycan pioneri” qəzeti redaksiyasında ədəbi işçi, şöbə müdiri, 1971-1976-cı illərdə “Ədəbiyyat və incəsənət” qəzeti redaksiyasında məsul katib, 1976-1979-cu illərdə “Azərbaycan” jurnalı redaksiyasında məsul katib vəzifələrində çalışmışdır. Daha sonra o, Cəfər Cabbarlı adına “Azərbaycanfilm” kinostudiyasında bir il ssenarist olmuş, yenidən “Ədəbiyyat və incəsənət” qəzeti redaksiyasına qayıtmışdır.
Mustafayev 1985-1989-cu illərdə “Azərnəşr”də bədii ədəbiyyat şöbəsində müdir, 1989-1990-cı illərdə “Karvan” kitablar seriyası redaksiyasında məsul katib, 1990-1991-ci illərdə, “Respublika” qəzeti redaksiyasında baş redaktorun müavini, 1991-1993-cü illərdə “Həyat” qəzetində mədəniyyət şöbəsinin müdiri, 1993-2002-ci illərdə “Azərbaycan” qəzetinin baş redaktoru vəzifəsində çalışmışdır.
Mustafayevin ilk kitabı “Zolaqlı çemodan” adlanır. Yazıçı, həmçinin “Qayğı yükü”, “Gecə zəngi”, “Qara zolaq”, “Səndən ötrü“, “Ürəkdən asılan yük”, “Qara zolaq” kimi romanların, 20 povestin, 200 hekayənin, 500-dən artıq publisistik yazının müəllifidir. Yazıçıya şöhrət gətirən əsərlərdən biri onun “Qurd ürəyi” romanıdır. Onun povest və hekayələri Türkiyə, İran, İraq və Rusiyada nəşr edilmişdir.
O, jurnalistika sahəsində göstərdiyi xidmətə görə “Tərəqqi” medalı ilə təltif edilmiş, “Araz” ali ədəbi mükafatına, “Ustad” media mükafatına, “Kamil sənətkar” ali jurnalist mükafatına layiq görülmüşdür. Həmçinin Prezident təqaüdçüsü idi.
Əmir Mustafayev 27 iyul 2007-ci ildə Bakıda vəfat edib. O, Qusarda dəfn edilib.
İstinad edilən mənbələr:
