Bu gün qubalı fəxri tarixçi İlyas Babayevin doğum günüdür

İlyas Atababa oğlu Babayev 23 mart 1935-ci ildə Quba rayonunun Xanəgah kəndində anadan olub.

Tarixçi 1941-1948-ci illərdə Xanəgah kənd məktəbində, 1949-1952-ci illərdə isə Quba rayonunun Rustov kənd orta məktəbində oxuyub. O, 1953-1958-ci illərdə indiki Bakı Dövlət Universitetinin tarix fakültəsində təhsil alıb.

İlyas 1959-1990-cı illərdə Qəbələ arxeoloji ekspedisiyasının təşkilatçılarından və iştirakçılarından biri olmuşdur. O, 1965-ci ildə Azərbaycan SSR EA Tarix İnstitutunun Arxeologiya şöbəsinin baş laborantı idi.

Babayev 1987-ci ildən Azərbaycan SSR EA Tarix İnstitutunun Antik dövr arxeologiyası şöbəsinin müdiri vəzifəsində çalışmışdır. O, 1997-ci ildən Bakı Dövlət Universitetinin nəşr etdiyi “Tarix və onun problemləri” jurnalının redaksiya şurasının üzvü olub.

İlyas Babayev Qafqaz Albaniyası dövlətinin yaranması tarixini tədqiq etmişdir. Tarixçi 270-dən artıq elmi əsərin müəllifidir. Onun 80-dən çox elmi mə­qa­ləsi xarici ölkələr­də nəşr olunmuşdur. İlyas Babayev çoxcildlik “Azərbaycan tarixinin” I-II cildlərinin, “Azərbaycan numizmatikası”nın I cildinin, çoxcildlik “Azərbaycan Ensiklopediyası”nın, “Naxçıvan Ensiklopediyası”nın müəlliflərindən biridir.

İlyas Babayev 27 dekabr 2017-ci ildə Bakıda vəfat edib.

İstinad edilən mənbələr:

• “Elm” qəzeti.- 12 noyabr 2010.


• Quba və qubalılar. Bakı-2012.


• Şahin Fazil. Quba tarixi. Bakı-2016.


• Azərbycan arxeologiyası və etnoqrafiyası. Bakı-2004.


• Azərbycan arxeologiyası və etnoqrafiyası. Bakı-2010.


• https://ilyas-babayev.az/ilyas-atababa-oglu-babayevin-h%c9%99yati-v%c9%99-elmi-pedoqoji-f%c9%99aliyy%c9%99tinin-%c9%99sas-tarixl%c9%99ri/


• http://www.anl.az/down/meqale/xalqqazeti/2015/aprel/427826.htm


• https://science.gov.az/az/forms/skanchavshiesya-chlenyikorrespondentyi/3192


• https://1905.az/ilyas-atababa-oglu-babayev/