Bununla bağlı Shimal.news sizə Şahin Fazil haqqında faktlar təqdim edir. Şahin Fazil oğlu Fərzəliyev 27 mart 1940-cı ildə Quba şəhərində anadan olub.
Fərzəliyev şair, şərqşünas, tərcüməçi, Azərbaycan Yazıçılar Birliyinin üzvü, tarix üzrə elmlər doktorudur.
Fərzəliyev ədəbi fəaliyyətə 1950-ci illərdə başlamışdır. İlk şeiri “Qız Bənövşə” 1958-ci ildə “Qızıl Quba” qəzetində dərc olunmuşdur. O, 1997-ci ildən Yazıçılar İttifaqının üzvüdür.
Daha sonra o, indiki BDU-nun Şərqşünaslıq fakültəsinin fars dili şöbəsinə daxil olub. Şahin Fazil 1963-1966-cı illərdə Əfqanıstanda tərcüməçi kimi çalışmağa göndərilən ilk tələbə idi. Həmçinin Azərbaycan yazıçılarının şeirlərini fars dilinə tərcümə edib, oraya göndərirdi. Şahin Fazil, eyni zamanda farsca şeirlər yazıb, oradakı jurnallarda çap etdirirdi. O, bir neçə Fəxri Fərmanla (SSRİ) və üç Əfqanıstan ordeni ilə təltif olunmuşdur.
Şahin Fazil 2009-cu ildə Yaponiyanın Sinday Universitetinin dəvəti ilə Azərbaycan tarixşünaslığına dair mühazirə oxumuşdur.
Şahin Fərzəliyev 5 divan, 30-dan çox kitab, 300-dən artıq elmi məqalənin müəllifidir. Onlardan “Azərbaycan XV-XVI əsrlərdə” (Həsən bəy Rumlunun “Əhsənüt-təvarix” əsəri üzrə), “Azərbaycan və Osmanlı imperiyası XV-XVI əsrlərdə”, “Quba tarixi”, “XV əsr Azərbaycan dövlətlərinin quruluşu”nu qeyd etmək olar.
