Həkim-endokrinoloq və şair Tofiq Niyətulla oğlu Hacıyev 4 iyul 1953-cü ildə Qubanın Yerfi kəndində anadan olub. O, Tofiq Nurəli kimi tanınıb.
Tofiq Nurəli 1961-1968-ci illərdə Yerfi kənd səkkizillik məktəbini bitirəndən sonra 1968-1970-ci illərdə Bakıda 19 nömrəli orta məktəbdə təhsil almışdır. Daha sonra indiki Azərbaycan Tibb Universitetində müalicə-profilaktika fakültəsinə daxil olub, oranı fərqlənmə diplomu ilə bitirmişdir.
Tofiq Hacıyev 1976-1978-ci illərdə əmək fəaliyyətinə Bakıdakı indiki Musa Nağıyev Xəstəxanasında (köhnə Semaşko) başlayıb. 1978-1979-cu illərdə Mirqasımov adına Respublika Klinik xəstəxanasında həkim-internator kimi çalışıb. 1979-1980-ci illərdə Quba rayonunun Qonaqkənd Qəsəbə Xəstəxanasında terapevt-həkim vəzifəsində işləyib.
Tofiq Nurəli 1983-1985-ci illərdə Bakı şəhərinin 2 nömrəli xəstəxanasında həkim-ordinator, 12 nömrəli xəstəxanada isə həkim-terapevt kimi işləyib. O, uzun illər 17 saylı Tibb Sanitariya Hissəsinə rəhbərlik etmişdir.
Onun həkimlik fəaliyyətinə həsr olunmuş “Onkologiya xəstəxanasından fraqmentlər” silsiləsi, “Bir həkimin keçdiyi yol” adlı nəsr əsəri və tibb işçiləri gününə aid “Doktor” adlı bir şeiri var.
Tofiq Nurəlinin dediklərindən: “Sözün bu yerdə çox aciz olduğunu hiss edən, o dünyanı görüb gələn pasiyentlər həkimin üzündən yox, məhz əlindən öpməklə duyğularını çatdırmaq istəyirlər. Çünki dünyada insan həyatından qiymətli heç nə yoxdur və olmayacaq”.
Tofiq Nurəli ölkədə tibbi biliklərin geniş təbliği məqsədi ilə “Şəfqət” (indiki “Tibb qəzeti”) adlı ilk səhiyyə qəzetini yaratmışdır. O, 1991-1995-ci illərdə həmin qəzetin baş redaktoru olmuşdur.
Bədii yaradıcılığa gəldikdə isə 1984-cü ildə o, gənc yazıçıların VIII Ümumittifaq müşavirəsinin iştirakçısı olmuşdur. Onun “Şehrli kəpənəklər”, “Yağışdan sonra”, “Tənha bir qüssə”, “Tənha payız çiçəyi” şeir kitabları var. Tofiq Hacıyev 1988-ci ildən Azərbaycan Yazıçılar Birliyinin üzvüdür. O, həmçinin “Qaçaq Mayıl” kinopovestinin müəllifidir.
Xalq şairi Fikrət Qoca Tofiq Nurəlinin şeirlərini belə qiymətləndirmişdir:
“Tofiq klassik üslubda da, heca vəznində və sərbəst formada da eyni dərəcədə müvəffəqiyyətlidir, orijinaldır…Tofiq, həmçinin həssas şairdir. O, insan qəlbiylə ünsiyyəti bacarır…”
İstinad edilən mənbələr:
