Camo bəy Hacınski 14 iyun 1888-ci ildə (digər mənbələrdə 1887) Quba şəhərində anadan olub. O, ictimai-siyasi xadim və sənətşünas Mehdi bəy Hacınskinin qardaşıdır.
Camo bəy 1912-ci ildə Sankt-Peterburq Dövlət Universitetinin hüquq fakültəsini bitirib. Hacınski 1907-1915-ci illərdə “Kaspi” qəzetinin müxbiri və əməkdaşı olub. O, 1915-1917-ci illərdə Birinci Dünya müharibəsi (1914-1918) dövründə zərər çəkənlərə yardım edən müsəlman qaçqın komitəsinin müvəkkili idi. Hacınski “Nicat” mədəni-maarif cəmiyyətinin işində iştirak etmiş, 1916-1917-ci illərdə müsəlman dram cəmiyyətinin və 1917-ci ildə Azərbaycan arxeoloji cəmiyyətinin yaradıcılarından biri olmuşdur.
O, həmçinin 1917-ci ildə Cənubi Qafqaz Kəndli Deputatları Şurası İcraiyyə Komitəsi sədrinin müavini seçilmiş, oradan nümayəndə kimi Rusiya Müəssisələr məclisinə seçkilər üzrə Cənubi Qafqaz mərkəzi komissiyasının sədri vəzifəsinə təyin edilmişdir.
1918-ci ildə Hacınski “Türk yurdu” cəmiyyətində Azərbaycan incəsənətindən mühazirələr oxumuş, “Azərbaycan” və digər mətbuat orqanlarında “Qubalı” imzası ilə çıxış etmişdir. 1919-1920-ci illərdə Üzeyir Hacıbəylinin əsərləri haqqında, həmçinin Nəcəf bəy Vəzirov və digərləri haqqında məqalə və resenziyalar yazıb, “Milli nəğmələr” adlı kitabçalarda şeirləri dərc olunub.
AXC dövründə o, poçt və teleqraf naziri, AXC-nin Milli Şurasının üzvü və Azərbaycan İstiqlal Bəyannaməsini imzalayan üzvlərindən biri idi. 1920-ci ilin aprel işğalından sonra xalq ədliyyə komissarlığında inzibati-maliyyə şöbəsinin rəisi təyin olunmuş və maarif sahəsində fəaliyyətini davam etdirmişdir. Hacınskinin fəaliyyəti zamanı dağılmış teleqraf və telefon xətləri bərpa olunmuş, poçt şöbələrinin normal fəaliyyəti bərpa edilmişdir. Həmçinin onun 1919-cu ildə Bakı Dövlət Universitetinin yaradılmasında rolu olub.
İlk dəfə o, 21 aprel 1922-ci ildə həbs edilmişdir. 3 il həbsdə saxlandıqdan sonra Rusiyanın Solovki həbs düşərgəsinə göndərilmişdir.
1928-ci ilin iyununda o, azad edilərək Bakıya qayıtmışdır. Həmin ilin iyulundan respublika Kənd Təsərrüfatı Kooperasiyası İttifaqında plan şöbəsinin katibi olmuş, sonra şöbə müdiri vəzifəsini icra etmişdir. Hacınski 1933-cü ildə Azərittifaq sistemində işləmiş, bir ildən sonra sənaye kooperasiyasında baş məsləhətçi vəzifəsinə keçirilmişdir.
Lakin Camo bəy 1937-ci ildə vəzifə ləğv olunduğundan işdən çıxarılmış, ikinci dəfə 24 noyabr 1938-ci ildə həbs edilərək sürgün olunmuşdur.
O, 1942-ci ildə Rusiyanın Kirov vilayətinin Vyatna həbs düşərgəsində vəfat edib. Hacınskiyə 1956-cı ildə bəraət verilib.
İstinad edilən mənbələr:
