Bu gün 9 May – faşizm üzərində Qələbə Günüdür. 80 il əvvəl bu gün SSRİ alman faşizmi üzərində qələbə qazanıb.
22 iyun 1941-ci ildə faşist Almaniyası Sovet İttifaqına hücum etdi və Böyük Vətən müharibəsi başladı. Faşist Almaniyasına qarşı mübarizədə 600 mindən çox azərbaycanlı iştirak edib, onlardan 300 minə yaxın insan həlak olub.
Şimal rayonlarından onminlərlə qəhrəmanımız səfərbər edilib, həlak olub və ya itkin düşüb.
1941-ci ilin oktyabr ayında 223-cü atıcı diviziya yaradılmış və Quba-Qusar-Dəvəçi (indiki Şabran) zonasında yerləşdirilib. Diviziyanın döyüş yolu Şimali Qafqazdan başlayaraq Avstriyanın paytaxtı Vyanaya qədər uzanıb. Yuqoslaviyanın paytaxtı Belqradın azad edilməsindəki qəhrəmanlığına görə bu hərbi birləşməyə “Belqrad diviziyası” adı verilib.
