Balakənin qəhrəman oğlu "Danil" faşistlərə Fransada qorxu yaşadıb. O, Maqamalar kəndində doğulub. Daniyal Abdullayev İkinci Dünya Müharibəsində göstərdiyi qəhrəmanlıqla yadda qalan azərbaycanlı döyüşçülərdən biri olub.
Milli diviziyalar Qafqazdan Berlinədək döyüş yolu keçərək Moskva, Leninqrad və Avropanın bir sıra şəhərlərinin azad olunmasında iştirak ediblər. Həmin qəhrəmanlardan biri də Daniyal olub.
O, baş çavuş rütbəsində xidmət edib, komandir köməkçisi vəzifəsində çalışıb və Brest qalasının müdafiəsinin iştirakçılarından olub.
Döyüşlərin birində o, hiylə işlədərək papağını dirəyə keçirib və almanların diqqətini yayındırıb. Düşmən uzun müddət həmin istiqamətə atəş açdığı vaxt Daniyal Abdullayev başqa mövqedən hücuma keçərək alman tankını qumbara ilə məhv edib. Lakin az sonra ağır yaralanaraq huşunu itirib və əsir götürülüb.
O, Polşa və Almaniyadakı bir neçə konslagerdən keçib. 1943-cü ildə düşərgədən qaçmağa nail olan Daniyal Abdullayev Fransız müqavimət hərəkatına qoşulub. "Danil" ləqəbi ilə tanınan azərbaycanlı döyüşçü qısa müddətdə sıravi partizandan rota komandirinə qədər yüksəlib.
Məlumata görə, onun rəhbərlik etdiyi partizan dəstələri alman hərbi eşalonlarını partladır, körpüləri sıradan çıxarır və faşist komendantlıqlarına qəfil hücumlar təşkil edirdi. Fransız arxivlərində "Azərbaycanlı Danil"in əməliyyatlarının alman qüvvələri arasında ciddi təşviş yaratdığı qeyd olunur.
Qəhrəmanlığına görə Daniyal Abdullayev iki dəfə Fransanın "Hərbi Xaç" ordeni ilə təltif edilib. O, həmçinin Fransanın Müqavimət Hərəkatı medalı, SSRİ-nin "İgidliyə görə" medalı və I dərəcəli "Vətən Müharibəsi" ordeni ilə mükafatlandırılıb.
Mənbələrdə bildirilir ki, Şarl de Qoll sovet partizanlarının şücaətindən danışarkən "Azərbaycanlı Danil"in adını xüsusi vurğulayıb.
Müharibədən sonra Azərbaycana qayıdan Daniyal Abdullayev bir çox keçmiş əsirlər kimi əvvəlcə şübhə ilə qarşılansa da, sonradan onun qəhrəmanlığı rəsmi şəkildə tanınıb.
Balakənin qəhrəman oğlu Daniyal Abdullayev 1968-ci ildə vəfat edib.
