Azərbaycan və Koreya arxeoloqları Qəbələnin Çuxur Qəbələ ərazisində birgə tədqiqatlarını davam etdirirlər.
Məlumata görə, beynəlxalq ekspedisiya artıq 17 ildir qədim Qəbələ şəhərinin ərazisində araşdırmalar aparır.
Builki fəaliyyəti avqustun sonunadək davam edəcək. Qazıntılar əsasən Səlbir yaşayış yerinin şimal-qərb qapısı ətrafında həyata keçirilir. Ekspedisiya rəhbəri Ceyhun Eminlinin sözlərinə görə, indiyədək 32 metr uzunluğunda müdafiə divarı aşkar edilərək araşdırılıb. Divarın X-XI əsrlərə aid olduğu bildirilir.
2009-cu ildən aparılan araşdırmalar zamanı Səlbir ərazisində şəhərin müdafiə istehkamları, yaşayış və istehsalat tikililəri, hovuz, su və çirkab xətləri, qəbirlər, o cümlədən katakomba tipli məzarlar aşkarlanıb.
Qazıntılar zamanı saxsı qablar və müxtəlif bəzək əşyaları da tapılıb. Bu nümunələr qədim Qəbələdə şəhər həyatının və şəhərsalmanın səviyyəsini öyrənmək üçün mühüm əhəmiyyət daşıyır.
Qəbələ Azərbaycanın qədim şəhərlərindən biri olmaqla yanaşı, Qafqaz Albaniyasının paytaxtı kimi də tarixdə mühüm yer tutur.
Ekspedisiya çərçivəsində aşkar edilən maraqlı maddi-mədəniyyət nümunələri Çuxur Qəbələdəki Arxeoloji Mərkəzin sərgi salonunda nümayiş etdirilir.
