İsmayıllıda Ağsu çayı üzərində inşa olunan körpünün dayaqları tikilir. Layihə dolama yolların azaldılmasını və sürüşmə riskinin qarşısının alınmasını hədəfləyir.
Azərbaycan Avtomobil Yolları Dövlət Agentliyi (AAYDA) bildirilib ki, Muğanlı–İsmayıllı hissəsində körpünün tikintisi layihə üzrə nəzərdə tutulan qrafikə uyğun aparılır. İşlərin müəyyən edilmiş müddətdə başa çatdırılması və körpünün istifadəyə verilməsi planlaşdırılır. Lakin dəqiq açılış tarixi açıqlanmayıb.
Muğanlı–İsmayıllı–Qəbələ avtomobil yolunun 4,5-ci kilometrliyində yerləşən körpünün uzunluğu 1.135 metr, çay səviyyəsindən hündürlüyü 76,5 metrdir. Asma qüllələrin hündürlüyü isə 142 metr təşkil edir.
Dörd hərəkət zolağı nəzərdə tutulan yol layihəsinin əsas məqsədlərindən biri mövcud marşrutdakı dolamaların sayını azaltmaq və sürüşmə riskini minimuma endirməkdir.
Qeyd edək ki, körpünün tikintisinə Prezidentin 31 iyul 2020-ci il tarixli sərəncamı əsasında başlanılıb. Layihə üçün dövlət büdcəsinin Prezidentin ehtiyat fondundan ilkin olaraq 15 milyon manat ayrılıb.
