İsmayıllıda bəzi küçələrin rəsmi adının və evlərin nömrələrinin olmaması sakinlərin ünvanlarını müəyyənləşdirməsini çətinləşdirir. Bu, taksi, poçt və təcili tibbi yardım xidmətlərindən istifadə zamanı da problemlər yaradır.
Sakinlər ünvanlarını izah etmək üçün yaxınlıqdakı mağazaları, tanınmış obyektləri və digər nişangahları göstərməyə məcbur olurlar. Bəzən isə sifariş edilən bağlamalar ünvana çatdırılmadan geri qaytarılır.
Vətəndaşlar bildirirlər ki, taksilər və təcili tibbi yardım əməkdaşları da evləri tapmaqda çətinlik çəkirlər. Onlar küçələrə ad verilməsini, evlərin nömrələnməsini istəyirlər. Bəzi sakinlər küçələrə şəhidlərin və Vətən müharibəsi qəhrəmanlarının adlarının verilməsini təklif edirlər.
Memar Cahid Həsənovun sözlərinə görə, küçələrin adlandırılması və adlarının dəyişdirilməsi yerli icra hakimiyyəti orqanlarının səlahiyyətinə daxildir. Bu məqsədlə komissiyalar yaradılır, ərazidəki vəziyyət araşdırılır və sakinlərin rəy və təklifləri nəzərə alınır.
O qeyd edib ki, zamanla genişlənən yaşayış ərazilərində dalanlar böyüyərək küçələrə çevrilə bilər. Belə hallarda onların rəsmi adlandırılması zərurəti yaranır. Memar həmçinin küçə adları ilə bağlı məlumat lövhələrinin və QR kodların yerləşdirilməsini məqsədəuyğun hesab edir.
Millət vəkili Aydın Mirzəzadə isə bildirib ki, yeni küçələrin adlandırılması və reyestrə daxil edilməsi operativ şəkildə həyata keçirilməlidir. Onun sözlərinə görə, bu, sakinlərin mülkiyyət sənədlərini qaydaya salmasına və ünvanlarını rəsmiləşdirməsinə də kömək edər.
Sakinlər problemin həlli üçün aidiyyəti qurumların tədbir görməsini gözləyirlər.
Mənbə: Xəzər TV
