Şabran rayonunun Qazbabalı kəndində sel və torpaq sürüşməsi nəticəsində ciddi zərər görən fərdi yaşayış evinin sahibi kömək gözləyir.
Shimal.News-a danışan ev sahibi Fəridə Zərbalı qızı Mərdanovanın sözlərinə görə, cari il mart ayının 27-28-də yağan güclü leysan yağışlarından sonra baş verən sel və torpaq sürüşməsi evini yararsız vəziyyətə salıb. Yamacdan qopan torpaq kütləsi sel suları ilə birlikdə evə doğru hərəkət edib və yaşayış sahəsini su basıb.
Sakin bildirir ki, hadisə nəticəsində evin bir divarı tamamilə uçub, digər divarları isə qəzalı vəziyyətə düşüb. Hazırda evdə üç azyaşlı uşaq yaşayır. Fəridə Mərdanova özü də səhhətindəki problemlərə görə çətinlik çəkdiyini deyir.
"Yağış yağanda evimə girib-çıxa bilmirəm. Evdə üç balaca uşaq yaşayır. Mənim də müəyyən sağlamlıq problemlərim var. Çarəsiz vəziyyətdə qalmışıq, heç kim bizə kömək etmir", - deyə o bildirib.
Zərərçəkmişin sözlərinə görə, məsələ ilə bağlı aidiyyəti qurumlara müraciət etsə də, indiyədək problemin həlli istiqamətində hər hansı tədbir görülməyib.
Məsələ ilə bağlı Shimal.News-un sorğusuna cavab olaraq Şabran Rayon İcra Hakimiyyətindən bildirilib ki, Fəridə Mərdanovaya məxsus evə Fövqəladə Hallar Nazirliyinin və rayonun müvafiq qurumlarının əməkdaşları tərəfindən baxış keçirilib.
"Hazırda baxışın nəticələri ilə bağlı cavab gözlənilir. Rəsmi cavab daxil olduqdan sonra vətəndaşa məlumat veriləcək".
Fövqəladə Hallar Nazirliyinin Mətbuat Xidmətindən isə bildirilib ki, Nazirlər Kabinetinin müvafiq protokoluna əsasən, quruma qəza vəziyyətinə düşmüş yaşayış obyektlərinə dəymiş ziyanın müəyyənləşdirilməsi və zəruri işlərin həyata keçirilməsi tapşırılıb. Bu səbəbdən müraciətlə bağlı əlavə kömək göstərilməsi mümkün deyil.
