Şabran şəhərinin düz mərkəzində qəribə mənzərə yaşanır. Məişət tullantıları vaxtında daşınmadığı üçün şəhərin yeni “sanitariya xidməti” ortaya çıxıb – inəklər. Hər gün bu heyvanlar mərkəzi küçələrdə zibilliyə yaxınlaşaraq plastik torbalar arasından yeməli bir şeylər axtarırlar.
Bu vəziyyət bir neçə sual doğurur. Görəsən, şəhər rəhbərliyi bu mənzərədən xəbərdardırmı? Əgər belə davam edərsə, bəlkə də Şabranın girişində yeni bir lövhə quraşdırmaq lazım gələcək: “Şəhərimizin təmizliyi inəklərin öhdəsindədir!”
Əslində, bu, sadəcə bir şəhər estetikasının pozulması məsələsi deyil. Tullantıların vaxtında daşınmaması ekoloji problemlərə yol açır, antisanitariyaya səbəb olur və nəticədə insan sağlamlığı üçün ciddi təhlükə yaradır. Digər tərəfdən, inəklərin plastik torbalar və digər zərərli maddələri yeməsi onların sağlamlığı üçün ölümcül ola bilər.
Maraqlıdır, aidiyyəti qurumlar bu mənzərəni görmür, yoxsa görməzliyə vururlar özlərini? Şabranın təmizliyinə cavabdeh olanlar vətəndaşlardan şikayət eşidəndə “yol tapılacaq” deyib, sonra unudurlarmı? Bəlkə də yeni bir ideya irəli sürmək lazımdır: tullantılar vaxtında daşınmayacaqsa, heç olmasa, inəklərə xüsusi “işçi geyimi” tikilsin ki, şəhər sakinləri onların fədakarlığını daha yaxşı görə bilsinlər!
Təəssüf ki, reallıq acıdır: Şabranın küçələri tədricən zibilliyə çevrilir, heyvanlar isə bu zibilliklərdən qidalanmağa məcbur olur. Bu vəziyyət nə vətəndaşlara, nə də inəklərə yaraşır. Ümid edək ki, aidiyyəti qurumlar tezliklə hərəkətə keçəcək və şəhərin təmizliyi inəklərə həvalə olunmayacaq.
Məhəmməd Tağı
