Aprelin 16-da güclü leysan nəticəsində Şabran rayonunda sel fəlakəti baş verib. Hadisə nəticəsində bir neçə evə və təsərrüfata ciddi ziyan dəyib. Sakinlər vəziyyətin təhlükəli olduğunu bildirərək aidiyyəti qurumlara müraciət ediblər.
Şabran sakinlərinin Shimal.News-a verdiyi məlumata görə, çayın məcrası dəyişməsə də, yağıntının davam edəcəyi proqnozlaşdırılır. Xüsusilə aprelin 25-də gözlənilən intensiv yağışlar güclü daşqınlara və bu dəfə daha çox evin su altında qalmasına səbəb ola bilər.
Vəziyyətin ağırlığı təkcə su basqınları ilə bitmir. Hal-hazırda bölgədə yol problemi də yaşanır. Bəzi sakinlər evlərinə getmək üçün qonşularının damına çıxaraq birtəhər öz evlərinin damına keçmək, mənzilinə çatmaq məcburiyyətində qalırlar. Bu da həm təhlükəli, həm də sosial baxımdan çətin bir vəziyyətdir.
Sakinlərin sözlərinə görə, sovet dövründə avtovağzal tərəfdən çayın kənarı betonlanmışdı və həmin betonlar su axınının qarşısını alırdı. Lakin sonradan bu betonlar müxtəlif məqsədlərlə sökülüb aparılıb. Nəticədə çayın kənarının möhkəmləndirilməsi işi yarımçıq qalıb. Hazırda sel zamanı çay asanlıqla daşır və ətraf yaşayış məntəqələrinə təhlükə yaradır.
Məsələ ilə bağlı danışan Şabran sakini qeyd edir:
"Çayın kənarı betonlanmadığı üçün hər dəfə yağış yağanda qorxu və təlaşa qapılırıq. Uşaqlarımız, evlərimiz, mal-qaramız təhlükə altındadır. Xahiş edirik, bu məsələni işıqlandırın, aidiyyəti qurumlar nəhayət addım atsın".
Hazırda sakinlərin ümidləri media və ictimai dəstəyədir. Sual isə açıq qalır: Görəsən, məsul qurumlar bu dəfə vətəndaşın səsinə səs verəcək?
