Bu gün Azərbaycan Avtomobil Yolları Dövlət Agentliyinin (AAYDA) və digər qurumların nümayəndələri Quba-Qonaqkənd-Muçu avtomobil yolunda çökən körpüyə baxış keçiriblər.
AAYDA-nın süni qurğuların istismarı və təmiri şöbəsinin rəisi Asim Məmmədlinin Shimal.News-a müsahibəsi:
“Hazırda Quba-Qonaqkənd avtomobil yolunun 7-ci km-dəyik. Üzərində dayandığımız körpüdə son günlərdə yağan aramsız leysan yağışları nəticəsində əmələ gələn sel sularının təsirindən bir dayağının özül hissəsinin yuyulması prosesi baş verib. Qəzalı vəziyyətin yaranması ehtimalı barədə Agentliyə məlumat daxil olduğu anda operativ şəkildə tədbirlər görülüb, körpü üzərindən nəqliyyat vasitələrinin hərəkəti tam məhdudlaşdırılıb. Hazırda AAYDA və digər aidiyyəti qurumların nümayəndələrinin birgə komissiyası öz fəaliyyətini davam etdirir. Körpüyə baxış keçirilir. Nəticələrdən asılı olaraq, tədbirlər planı hazırlanacaq, veriləcək yekun qərar ictimaiyyətə çatdırılacaq”.
