Fevralın 5-8-də Qəbələdə Beynəlxalq "Qış Nağılı" Musiqi Festivalı keçiriləcək.
Shimal.News xəbər verir ki, Üzeyir Hacıbəyli adına Bakı Musiqi Akademiyasının təşkilatçılığı, Heydər Əliyev Fondu, Azərbaycan Respublikası Mədəniyyət Nazirliyi və "Gilan" şirkətinin dəstəyi ilə ikinci dəfə reallaşan layihə 2009-cu ildən təşkil olunan Qəbələ Beynəlxalq Musiqi Festivalının davamı kimi sənətsevərləri bir araya gətirəcək.
Festival çərçivəsində Qəbələnin Heydər Əliyev Konqres Mərkəzində zəngin və rəngarəng musiqi proqramı təqdim olunacaq. Proqrama Qara Qarayevin xatirəsinə həsr edilmiş konsert, vokal və kamera instrumental musiqi axşamları, flamenko–caz musiqi gecəsi, həmçinin solo çıxışlar daxildir.
Tamaşaçılar Azərbaycan və dünya bəstəkarlarının sevilən əsərlərini dinləmək imkanı əldə edəcəklər.
Festivalda Azərbaycan Respublikasının Xalq artistləri Fərhad Bədəlbəyli, Murad Adıgözəlzadə, Əməkdar artistlər Afaq Abbasova, Əyyub Quliyev, Emil Əfrasiyab, eləcə də respublika və beynəlxalq müsabiqələr laureatları Aysun Mahmudova, Azər-Rza, Aytac Şıxəlizadə, Həsən Bilalov, İbrahim Babayev, Mahir Tağızadə, Nicat Aslanov və Ruslan Hüseynov çıxış edəcəklər.
Musiqi kollektivləri sırasında Azərbaycan Dövlət Akademik Opera və Balet Teatrının Simfonik Orkestri, Azərbaycan Dövlət Simli Kvarteti yer alır. Festivalın xüsusi qonaqları isə İspaniyadan olan tanınmış musiqiçilər — Cristina Cazorla, Javier Moreno və Andrés Barrios olacaq.
