Azərbaycanın intellektual gələcəyi üçün ümidverici gənclərdən biri – Şabran şəhəri Tofiq Abbasov adına 1 nömrəli tam orta məktəbin 6-cı sinif şagirdi Əli Rəhman oğlu Məmmədzadə bu il Respublika Fənn Müsabiqəsində informatika fənni üzrə 100 bal toplayaraq həm Qızıl medal, həm də "birincilərin birincisi" adına layiq görülüb. Kiçik yaşlarından texnologiyalara marağı ilə seçilən Əli bu uğuru ilə təkcə rayonunu deyil, ölkəmizi də sevindirib.
– Əli, ilk olaraq səni bu böyük uğurun münasibətilə təbrik edirik. Bu nəticə sənin üçün nə deməkdir?
– Çox sağ olun. Mənim üçün bu nəticə illərlə gördüyüm zəhmətin bəhrəsidir. Ən yüksək nəticəni göstərmək və "birincilərin birincisi" adını almaq mənə həm motivasiya, həm də daha böyük məsuliyyət verdi.
– İnformatikaya marağın nə vaxtdan başladı?
– Mən balaca olanda anam mənə bir kompüter almışdı. İlk vaxtlar sadəcə maraqla oyunlar oynayırdım. Sonra proqramlaşdırma, kodlaşdırma haqqında videolara baxmağa başladım. Getdikcə bu sahəyə sevgim artdı və bu gün də informatika mənim ən sevdiyim fəndir.
– Hazırda hansı proqramlaşdırma dillərini bilirsən və nə üzərində işləyirsən?
– Hal-hazırda Python və Scratch ilə işləyirəm. Bəzən HTML və JavaScript-ə də baxıram. Kiçik oyunlar və sadə proqramlar yazıram. Hədəfim informasiya təhlükəsizliyi sahəsində peşəkar olmaqdır.
– Sənə lisey və gimnaziyalara imtahansız qəbul haqqı verilib. Amma sən doğma məktəbində qalmaq istəyirsən. Bu qərarın səbəbi nədir?
– Məncə insanı böyüdən ilk növbədə onun məktəbi və müəllimləridir. Mən buradakı mühitə çox öyrəşmişəm, müəllimlərimə və sinif yoldaşlarıma bağlıyam. Uğurlarımda onların böyük rolu var və ona görə də təhsilimi doğma məktəbimdə davam etdirmək istəyirəm.
– Respublika Fənn Müsabiqəsi ilə yanaşı beynəlxalq səviyyəli yarışmalarda da iştirak etdiyini bilirik. Hansı nəticələr var?
– Bəli, bir neçə beynəlxalq olimpiadada iştirak etmişəm, STEAM layihələri üzrə keçirilən müsabiqələrdə medal və fəxri fərmanlar qazanmışam. Bu il "Kod saatı" və Fənn Olimpiadalarında da iştirak etməyi və qalib olmağı qarşıma məqsəd qoymuşam.
– Sonda sənin kimi informatika sahəsinə marağı olan yaşıdlarına nə tövsiyə edərdin?
– Əsas odur ki, insan sevdiyi sahəni tapsın və ona fokuslansın. İnformatika çox geniş və maraqlı sahədir. Əgər marağınız varsa, mütləq davam edin. Öyrənmək heç vaxt tez deyil və heç vaxt gec də deyil.
Əlinin uğur hekayəsi sübut edir ki, istedad, zəhmət və hədəf bir araya gələndə mümkün olmayan heç nə yoxdur. Ona qarşıdakı yarışlarda da uğurlar arzu edirik!
