Siyəzən rayonunda fəaliyyət göstərən şirkətdən külli miqdarda soya yağını mənimsəməkdə təqsirləndirilən şəxslə bağlı məhkəmə qərar verib. Məhkəmə Rauf Rəfizadənin barəsindəki hökmdən verilmiş apellyasiya şikayətini təmin etməyib və birinci instansiya məhkəməsinin hökmü qüvvədə saxlanılıb.
İttihama görə, Rauf Rəfizadə ötən il rayonun Zarat kəndində yerləşən "Zarat İmport Export" MMC-də rəsmi əmək müqaviləsi olmadan, şifahi razılaşma əsasında sürücü işləyib.
Cinayət işi materiallarına əsasən, ona etibarnamə ilə həvalə edilən yük avtomobilinə satış məqsədilə ümumi çəkisi 13.800 kiloqram, dəyəri isə 36.570 manat olan soya yağı yüklənib. Təqsirləndirilən şəxs yükü qəbul etdiyini təsdiqləyən sənədi imzalasa da, məhsulu alıcıya çatdırmayıb.
İstintaq müəyyən edib ki, o, soya yağını əvvəlcədən tanıdığı şəxsə cəmi 15 200 manata sataraq əldə etdiyi pulu şəxsi ehtiyaclarına xərcləyib.
Siyəzən Rayon Məhkəməsi onu təqsirli bilərək 3 il 6 ay müddətinə azadlıqdan məhrum edib. Qeyd edək ki, ad və soyad şərtidir.
Mənbə: Pravda.az
