Xudatda hüquq-mühafizə orqanlarında çalışan şəxsi bıçaqlamaqda təqsirləndirilən Kamran Tağıyevin 6 illik həbs cəzası qüvvədə saxlanılıb.
Təqsirləndirilən şəxsin hökmə verdiyi apellyasiya şikayətinə baxılıb və təmin edilməyib.
İttihama görə, hadisə 2025-ci il yanvarın 15-də Xaçmaz rayonunun Xudat şəhərində baş verib.
Kamran Tağıyev axşam saatlarında şəhər parkında hüquq-mühafizə orqanlarından birində çalışan tanışı İ.İ. ilə qarşılaşıb. Orta dərəcəli alkoqol sərxoşluğu vəziyyətində olan Kamran zərərçəkmişə peşə fəaliyyəti ilə bağlı nalayiq ifadələr işlədib və aralarında mübahisə yaranıb.
Ətrafdakı şəxslərin müdaxiləsindən sonra tərəflər ayrılıb. Lakin ittihama əsasən, Kamran evinə gedərək mətbəx bıçağı götürüb və yenidən tanışını axtarmağa çıxıb.
Həmin gün saat 23:00 radələrində Xudatın S.Stallı küçəsində İ.İ.-ni taparaq ona bıçaqla iki zərbə endirib. Zərbələrdən biri kürək, digəri isə sağ əl nahiyəsinə dəyib.
Kamran Tağıyev məhkəmədə özünü qismən təqsirli hesab edib.
Sumqayıt Ağır Cinayətlər Məhkəməsinin hökmü ilə o, ümumi rejimli cəzaçəkmə müəssisəsində 6 il müddətinə azadlıqdan məhrum edilib.
Apellyasiya instansiyası həmin qərarı dəyişmədən saxlayıb.
Mənbə: Pravda.az
