Ölkədə tikilən mənzillərin orta sahəsi sürətlə azalıb.
Musavat.com-un məlumatına görə, söhbət özəl şirkətlər və dövlət tərəfindən tikilən mənzillərdən gedir. Onların orta sahəsi 2018-ci ildə 136,3 kvadratmetr olub, 2023-cü ildə 109,5 kvadratmetrə qədər azalıb. Vətəndaşların şəxsi vəsaiti hesabına tikilən mənzillərdə bu göstərici demək olar ki, dəyişməyərək 140,4 kvadratmetrə bərabər olub.
Son 5 ildə mənzil tikintisinə yatırılan vəsait artsa da, tikilən mənzil sahəsində ciddi azalma qeydə alınıb. Məsələn, 2019-cu ildə Bakıda 7 milyon 964 min 129,6 kvadratmetr, 2023-cü ildə cəmi 1 milyon 431 min 664,9 kvadratmetr mənzil sahəsi tikilib. Naxçıvanda bu göstərici həmin müddətdə 395 min 253 kvadratmetrdən 239 min 854,9 kvadratmetrə, Abşeron-Xızı iqtisadi rayonunda 214 min 95,7 kvadratmetrdən 92 min 530,2 kvadratmetrə qədər azalıb. Artım yalnız Mərkəzi Aran və Quba-Xaçmaz iqtisadi rayonlarında qeydə alınıb.
Beləliklə, statistik göstəricilərdən aydın olur ki, ölkədə mənzil tikintisi sürətlə azalır, amma ona yönəldilən vəsait çoxalır. Bu isə mənzil qiymətlərinin bahalaşmasından irəli gəlir.
