Şəki şəhərinin müxtəlif ərazilərində sahibsiz it və pişiklərin uzun müddətdir ki, zəhərləndiyi iddia edilir. Sosial şəbəkələrdə yayılan görüntülərdə heyvanların qıcolma keçirdiyi və əzab çəkdiyi görünür.
Shimal.News xəbər verir ki, görüntülər Naynuxana Shelter-in rəhbəri Nizami Ramazanov tərəfindən paylaşılıb. O, şəhərin müxtəlif ərazilərində sahibsiz heyvanların qəddarcasına öldürüldüyünü bildirib.
Bildirilir ki, bu dəfə zəhərlənərək öldürülən heyvanlar arasında pişiklər də var.
Görüntülərdə bəzi itlərin qulaqlarında xüsusi nişanlar görünür. Heyvan müdafiəçisinin sözlərinə görə, bu nişanlar onların sterilizasiya və peyvəndləmə də daxil olmaqla baytarlıq prosedurlarından keçdiyini göstərir.
Görüntülər sosial şəbəkə istifadəçilərinin narazılığına səbəb olub. İstifadəçilər heyvanlarla bu cür davranışı qəbuledilməz hesab ediblər.
Hadisə ilə bağlı heyvanların hansı şəraitdə zəhərləndiyi, bunu kimin törətdiyi və məsul şəxslərin olub-olmadığı barədə rəsmi məlumat açıqlanmayıb.
Məsələ ilə bağlı müvafiq quruma sorğu ünvanlanıb.
