Siyəzəndə ünvanlı sosial yardıma görə qayınata kürəkəninə xəsarət yetirib.
Siyəzən sakini Orxan Məmmədov (soyadı şərtidir – red.) bir müddət əvvəl həbs edilib. Cəzasının müəyyən hissəsini çəkdikdən sonra ona amnistiya aktı tətbiq olunub və o, azadlığa buraxılıb.
Bundan sonra aztəminatlı ailə kimi müraciəti əsasında Orxana ünvanlı dövlət sosial yardımı təyin edilib.
Bir neçə ay sonra Orxan həyat yoldaşından sosial yardım kartını istəyib. Məlum olub ki, ailənin sosial yardım kartı qayınanasındadır. Bu səbəbdən ər-arvad arasında mübahisə yaranıb. Həyat yoldaşı isə atasının evinə gedib.
Bir neçə gün sonra Orxan ailəsinin arxasınca qayınatasının evinə gedərək həyat yoldaşından evə qayıtmasını istəyib. Bu zaman qayınatası Əsəd ilə Orxan arasında mübahisə yaranıb. Mübahisə zamanı Əsəd əlindəki bellə kürəkəninin baş və üz nahiyələrinə xəsarət yetirib.
Hadisə yerinə gələn polis əməkdaşları Əsədi saxlayıblar. Faktla bağlı cinayət işi başlanılıb və iş məhkəməyə göndərilib.
Məhkəmənin hökmü ilə Əsəd 1200 manat məbləğində cərimə edilib.
Mənbə: Oxu.аz
