Sumqayıt Ağır Cinayətlər Məhkəməsində Qubada tanışını bıçaqlamaqda təqsirləndirilən Namiq İslamovun (ad və soyad şərtidir) cinayət işi üzrə hökm oxunub. O, 6 il müddətinə azadlıqdan məhrum edilib.
İttiham aktına əsasən, hadisə 2025-ci ilin aprel ayında saat 18:00 radələrində Quba rayonunun Vəlvələ kəndində, Bakı-Quba avtomobil yolunun kənarındakı kafelərdən birində baş verib.
Belə ki, Namiq İslamov əvvəllər tanıdığı Qalib Mürşidovla (ad və soyad şərtidir) kafedə yeyib-içdikdən sonra özünə məxsus "Opel" markalı avtomobilin yanına gəlib.
Zərərçəkmiş şəxs onun sərxoş olduğunu görərək avtomobil idarə etməməyi, əvvəlcə çay içib özünə gəlməyi təklif edib. Bu zaman tərəflər arasında mübahisə yaranıb. Təqsirləndirilən şəxs üzərindəki bıçaqla Qalibin qarın nahiyəsinə bir dəfə zərbə vurub.
İş materiallarına görə, bıçaq yarası qarın boşluğuna nüfuz edib, nəticədə mədənin arxa divarı, böyük piylik və köndələn bağırsağın müsariqəsi zədələnib.
İttihama görə, Namiq İslamov hadisəni xuliqanlıq niyyəti ilə törədərək zərərçəkmiş şəxsin sağlamlığına qəsdən ağır zərər vurub. Hadisədən sonra o, saxlanılaraq cinayət məsuliyyətinə cəlb edilib.
