Şəki Ağır Cinayətlər Məhkəməsində qəsdən sağlamlığa ağır zərər vurmaqda təqsirləndirilən Eyvaz Cavadovun (ad, soyad şərtidir) cinayət işi üzrə məhkəmə istintaqı başa çatıb.
Sonuncu məhkəmə iclasında hökm oxunub. Məhkəmənin hökmü ilə Eyvaz Cavadov şərti cəzaya məhkum edilib və məhkəmə zalında həbsdən azad olunub.
İttihama əsasən, hadisə bu il Xızı rayonunun Şorabad qəsəbəsində baş verib.
Belə ki, Eyvaz Cavadov qohumu olan zərərçəkmiş Əli Quliyevlə (ad, soyad şərtidir) birlikdə balıq ovuna çıxıb. Daha sonra onlar qəsəbədə yerləşən fərdi yaşayış evinin həyətinə gəliblər.
Burada balıq torlarını təmizləyərkən aralarında əvvəlcə sözlü mübahisə yaranıb. Mübahisə daha sonra qarşıdurmaya çevrilib.
İttihama görə, Əli yerdən daş götürərək Eyvazın başını əzəcəyi ilə hədələyib və onun üzərinə gəlib. Həmin vaxt Eyvazın əlində balıq torlarını təmizləmək üçün istifadə etdiyi mətbəx bıçağı olub.
Təqsirləndirilən şəxs həmin bıçaqla Əlinin döş qəfəsinə bir dəfə zərbə endirib.
Nəticədə zərərçəkmişin döş qəfəsinin sol yarısına nüfuz edən və qanaxma ilə müşayiət olunan kəsilmiş-deşilmiş yara yaranıb.
Hadisədən sonra Eyvaz Cavadov saxlanılıb və barəsində cinayət işi başlanıb.
Məhkəmənin hökmü ilə ona şərti cəza verilib.
Mənbə: Pravda.az
