Şabranda narkotik istifadəçisi olan şəxs toyuq və pul oğurluğuna əl atıb.
Shimal.news-un məlumatına görə, hadisə şəhərin Xətai küçəsində qeydə alınıb.
Belə ki, 1996-ci il təvəllüdlü Elşad Hüseynov (ad şərti) gecə saatlarında məftil hasardan tullanaraq ərazidəki evlərdən birinin həyətinə daxil olub. Daha sonra özü ilə gətirdiyi vintaçan vasitəsilə evin pəncərəsini açaraq içəri keçib. O, yataq otağındakı dolabdan 500 manat nağd pul götürüb.
Bundan sonra təqsirləndirilən şəxs evin həyətindəki toyuqları da oğurlamaq qərarına gəlib. O, beş toyuğu tutaraq kisəyə yığıb və yaxınlıqdakı yarımtikiliyə apararaq gizlədib. İstintaq materiallarında ümumilikdə altı toyuğun oğurlandığı, onların ümumi dəyərinin 72 manat olduğu göstərilib.
Təqsirləndirilən şəxsin ifadəsinə görə, oğurladığı toyuqları ertəsi gün taksi ilə gizlətdiyi yerdən götürərək Şabran şəhər Mərkəzi bazarına aparıb və Babək adlı alverçiyə 42 manata satıb.
Elşad Hüseynov məhkəmədə əməlini etiraf edib və törətdiyi cinayətə görə peşman olduğunu bildirib. O, narkotik vasitələrdən təxminən iki ildir istifadə etdiyini və maddi ehtiyac səbəbindən oğurluqlar etdiyini deyib.
Məhkəmə iclasında zərərçəkmiş şəxs təqsirləndirilən şəxsdən şikayət və tələbinin olmadığını, dəymiş maddi ziyan tam şəkildə ödənildiyini bildirib.
Şabran Rayon Məhkəməsi Elşad Hüseynovu təqsirli bilərək, ona 2 il müddətinə azadlığın məhdudlaşdırılması cəzası təyin edib.
Əsmər Sənani
