Çiləgir kəndi Xaçmaz rayonunda, Məzarçayın sol sahilində, Samur-Dəvəçi ovalığında yerləşir. Tədqiqatçıların ehtimalına görə, kəndin adı XVI əsrdə Anadoluda (Türkiyə) yaranmış Boz Ulus tayfa ittifaqına daxil olan çilaxir tayfasının adı ilə bağlıdır.
1980-ci illərdə Xaçmaz rayonunun Çiləgir kəndində mis pul dəfinəsi tapılıb. Həmin dəfinədə X-XIII əsrlərə aid olan sikkələr var idi. Onların üzərindəki yazılar bunlar idi: “Şirvanşah Fəribuzz ben Salar”, “Şirvanşah əbu Nasir Yəzid Əhməd ibn Mühəmməd”, “Şirvanşah Salar ibn Yəzid” (1049-1063), “Atabəylər”. Bundan əlavə, dəfinədə üzərində “Monqol Abaqa xan tərəfindən zərb olunmuş pul” yazısı ilə monqol dövrünə aid çəkisi 5 qram, diametri 18-20 mm olan sikkələr var idi.
“Qafqaz təqvimi”nin 1914-cü il siyahıyaalınmasına görə, Çiləgir kəndində 80 nəfər yaşayıb. 2009-cu ilin rəsmi məlumatına əsasən, kəndin əhalisi 1241 nəfər təşkil edib.
Eyniadlı kənd Qusar rayonunda da yerləşir. Quba rayonu ərazisindəki Cağacıq çayı ilə Qaraçayın suayırıcısında yerləşən dağ və həmin çayın bir qolu da Çiləgir adlanır.
İstinad edilən mənbələr:
