Lahıcda lentə alınan “Yay gününün xəzan yarpaqları” filmi Moskva Mərkəzi televiziyasının sifarişi ilə 1987-ci ildə çəkilib.
Ekran əsərində atalar və oğullar probleminə toxunulur və yaşlıların yeniyetmələrin şüurunun formalaşmasında və yetkinləşməsində rollarından bəhs olunur. Ehtimal edilir ki, filmdə əsas tənqidi ideya burada kənd məktəbinin problemləri fonunda səlahiyyətli şəxslərin daşıdığı vəzifə məsuliyyətsizliyi, etinasızlığı, təhsil siyasətinin düzgün qurulmamasıdır. Buna səbəb isə filmin yenidənqurma illərində lentə alınmasıdır.
Bundan əlavə, filmdə ucqar kənddə təhsilin problemlərini mərkəzə gətirməklə yararsız infrastruktur, erkən nikahlar, gənclərin kənddən köçü və digər məsələlərə də toxunulur.
Filmdə əsas rol Şəmsi (Səyavuş Aslan) adlı məktəb direktoruna məxsusdur. O, şagirdlərin savadlı olması uğrunda mübarizə aparır və dərslərin keyfiyyətini qaldırmaq istəyir. Şəmsinin fədakarlığına baxmayaraq, kənd sakinləri onu qəbul etməsə də, direktor yolundan dönmür.
Filmin rejissoru Tofiq İsmayılov, ssenari müəllifi isə Asim Cəlilovdur. Rollarda Səyavuş Aslan (Şəmsi), Firəngiz Şərifova (Güllü), Rafael Dadaşov (Məmmədov), Hacı İsmayılov (mühasib), Yaşar Nuriyev (Rizvan), Nəcibə Hüseynova (Nərgiz) və başqaları çəkiliblər.
2011-ci ildə Dövlət Film Fondu və Rusiya Teleradio Fondu ilə birlikdə həyata keçirilən “Yay gününün xəzan yarpaqları” filminin bərpası başa çatıb. Rus dilində olan film Azərbaycan Dövlət Televiziyası tərəfindən dublyaj olunub.
İstinad edilən mənbələr:
