Rahim Həmdulla oğlu Dünyamalı 18 dekabr 1948-ci ildə Quba rayonunun Zizik kəndində anadan olub.
Yazıçı 1970-1975-ci illərdə indiki Bakı Dövlət Universitetinin jurnalistika fakültəsində təhsil alıb, 1975-ci ildə o, təyinatla Kəlbəcər rayonunda “Yenilik” qəzetinə işləməyə göndərilib. Rahim 1979-cu ilədək Kəlbəcərdə kənd təsərrüfatı şöbəsinin müdiri işləyib.
Yazıçı 1979-cu ildə indiki Qusar qəzetinin redaksiyasında korrektor və müxbir kimi çalışmışdır. 1979-1981-ci illərdə o, fərdi yaradıcılıqla məşğul olmuşdur. 1981-1995-ci illərdə isə Quba radiosunun verilişləri redaksiyasında redaktor vəzifəsində çalışmışdır.
Rahim 1993-cü ildən Azərbaycan Yazıçılar Birliyinin üzvü idi. Onun “Bir gecənin bəyazlığı”, “Torpaqdan güc alanda”, “Yadigar qaranquşlar”, “Tərsinə addımlayan kölgələr” kimi əsərləri var. Yazıçının, həmçinin “Sonuncu nərə” romanı da vardır, lakin bu əsər çap olunmamışdır.
Tənqidçi, filologiya elmləri doktoru Vaqif Yusiflinin qeydlərindən: “Rahim həvəskar yaradıcılıqdan professional yazıçılığa qədər bir uzun, bəlkə, hər günü onun ömrünü əridən yol keçmişdi. Ürəkdən yazmaq ehtirası… cümlələr sel kimi axıb gəlir, yığıb-yığışdıra bilmirsən... Nəşriyyatların qapısı isə boz, redaktorların gözləri soyuq, baxışları qurum bağlayıb. Redaksiyalar uzun müddət Rahim Dünyamalını - Qubadan Bakıya yol ölçən bir cavanı, yaxına buraxmırdılar. Amma Rahim bütün bu maneələri öz əsəbləri, dözümü ilə sındıra, qopara bildi”.
Rahim Dünyamalı 9 sentyabr 1995-ci ildə Qubada ov tüfəngi ilə intihar edib. O, Qubanın Zizik kəndində dəfn olunub. İntihar səbəbi hələ də dəqiq məlum deyil.
İstinad edilən mənbələr:
Quba və qubalılar. Bakı-2012.
