Qiyasəddin Əsgər oğlu Qeybullayev 13 mart 1933-cü (1934) ildə Quba rayonunun Rustov qəsəbəsində anadan olub. O, Azərbaycanın tanınmış tarixçisi və etnoqrafıdır.
Qeybullayev 1958-ci ildə Bakı Dövlət Universitetinin tarix fakültəsini bitirib. O, 1958-1960-cı illərdə Cəlilabad rayonunun Sabirabad kənd tam orta məktəbində müəllim işləmişdir. Qeybullayev 1964-1973-cü illərdə AMEA-nın Tarix İnstitutunda kiçik elmi işçi, 1973-1992-ci illərdə baş elmi işçi, 1992-ci ildən isə həmin institutun Arxeologiya və Etnoqrafiya sektorunun aparıcı elmi işçisi olmuşdur.
O, ABŞ-də çap olunan “Türk dünyası” jurnalının redaksiya heyətinə seçilmiş, Azərbaycan Respublikası Milli Məclisinin yanında Toponimika Komissiyasının üzvü olmuşdur.
Qiyasəddin Qeybullayevin əsərlərindən “Azərbaycan toponimiyası”, “Qarabağ”, “Azərbaycanlıların etnogenezinə dair”, “Qədim türklər və Ermənistan”, “Azərbaycan türklərinin təşəkkülü tarixindən”, “Azərbaycanlıların etnik tarixinə dair”, “Gürcüstanda türk mənşəli toponimlərin izahlı lüğəti” və digərlərini qeyd etmək olar.
Qiyasəddin Qeybullayev 13 dekabr 2002-ci ildə vəfat edib. O, Quba rayonunun Rustov qəsəbəsində dəfn olunub.
İstinad edilən mənbələr:
