Rövşən Yerfi kimi tanınan Rövşən Həsənbaba oğlu Həsənli 23 aprel 1965-ci ildə Quba rayonunun Yerfi kəndində anadan olub.
O, 1972-1982-ci illərdə orta məktəbdə təhsil alıb. Rövşən Yerfi 1989-cu ildə Azərbaycan Mədəniyyət Fondunun keçirdiyi “Debüt-89” respublika ədəbi yaradıcılıq müsabiqəsinin qaliblərindən biri olmuşdur. Nasir 1986-1992-ci illərdə Bakı Dövlət Universitetinin kitabxanaşünaslıq-biblioqrafiya fakültəsində ali təhsil almışdır.
Rövşən Yerfi 1991-1995-ci illərdə Səhiyyə Nazirliyinin orqanı olan “Şəfqət” qəzetində (indiki “Tibb qəzeti”) ilk məsul katib işləmişdir. O, 1995-2012-ci illərdə Ədliyyə Nazirliyi Penitensiar Xidmətin zabit əməkdaşı olmuş, müxtəlif rejimli cəzaçəkmə müəssisələrində böyük inspektor vəzifəsində xidmət etmişdir.
Onun məqalələri 1988-ci ildən Azərbaycan qəzetlərində çap olunub. Mətbuatda ilk hekayəsi isə 1989-cu ildə dərc edilib.
Rövşən Yerfinin 2004-cü ildə “Üzdəniraq ada” adlı ilk kitabı işıq üzü görüb. 2008-ci ildə isə “Qadın düşərgəsi” povesti “Kitab klubu”nun həyata keçirdiyi “Sınaq nüsxəsi” layihəsində bəyənilərək çap edilmişdir. Onun, həmçinin “Lənətə gələnlər”, “Ziyarət”, “Baba yurdu”, “Residivist”, “Qazamat sanitarları” povestləri mövcuddur.
Nasirin əsərləri “Kaspi” qəzetində, “Azərbaycan”, “Ulduz”, “Yazı” “Mars”, “Aran”, “Eko-inter” jurnallarında, “Dirili Qurbani məclisi”nin 6 almanaxında və digər müxtəlif 4 topluda çap olunmuşdur.
Rövşən Yerfi 1993-cü ildən Jurnalistlər Birliyinin, 2006-cı ildən Azərbaycan Yazıçılar Birliyinin üzvüdür.
İstinad edilən mənbələr:
