Kimya elmləri doktoru Soltan Cəfər oğlu Mehdiyev 2 dekabr 1914-cü ildə İsmayıllının Lahıc qəsəbəsində anadan olub.
O, Lahıcda orta məktəbini bitirdikdən sonra Bakı şəhərindəki Pedaqoji Texnikuma daxil olub.
Mehdiyev 1931-1934-cü illərdə Respublikanın müxtəlif rayonlarında kənd məktəblərində müəllim işləmişdir. Daha sonra o, 1934-1939-cu illərdə indiki Bakı Dövlət Universitetində kimya fakültəsində təhsil almışdır. Alim 1936-cı ildə SSRİ Elmlər Akademiyasının Azərbaycan Filialının Neft kimyası şöbəsində laborant vəzifəsində çalışmışdır. 1939-1941-ci illərdə isə indiki Neft-Kimya Prosesləri İnstitutunda aspirant kimi çalışmışdır.
Akademik İkinci Dünya müharibəsi illərində bəzi hərbi əhəmiyyətli partlayıcı maddələrin alınması üzərində çalışmışdır. O, 1943-cü ildə Tbilisidə namizədlik dissertasiyasını, 1955-ci ildə isə Moskvada doktorluq dissertasiyasını müdafiə etmişdir.
Soltan Mehdiyev 1956-1958-ci illərdə Azərbaycan Neft İnstitutunun direktoru olmuşdur. O, 1958-ci ildə Azərbaycan SSR Elmlər Akademiyasının müxbir üzvü, 1968-ci ildə isə EA-nın həqiqi üzvü seçilmişdir.
Mehdiyev 570 elmi əsərin müəllifidir. Onun əsərlərinin çox hissəsi xaricdə çap olunub. Alimin elmi rəhbərliyi altında 9 elmlər doktoru və 70-dən çox fəlsəfə doktoru yetişdirilmişdir.
Alim neft-kimya sahəsində elmi tədqiqatları təşkil etmək və elmi metodiki yardım göstərmək məqsədilə 1973-1974-cü illərdə İraqa ezam olunmuşdur. O, İraqın Bağdad şəhərində Neft sənaye tədqiqatı üzrə Beynəlxalq konqresin iştirakçısı idi.
Akademik İkinci Dünya müharibəsindən sonra “1941-1945-ci illər Böyük Vətən müharibəsində fədakar əməyə görə” və “Qafqazın müdafiəsinə görə” medalları ilə təltif olunub. Həmçinin alim elmi fəaliyyətinə görə iki dəfə “Fədakar əməyə görə” medalı ilə, “Xalqlar dostluğu” ordeni ilə təltif olunmuşdur və 1979-cu ildə “Azərbaycanın Əməkdar elm xadimi” fəxri adına layiq görülmüşdür.
Soltan Mehdiyev 12 oktyabr 1985-ci ildə Bakıda vəfat edib.
