Turistlər təkcə gecələmək üçün deyil, kənd təsərrüfatı məhsulları almaq və yerli mətbəxlə tanış olmaq üçün də bölgələrə üz tuturlar.
Qubanın Qımılqazma kəndində yaşayan Firuz İsmayılov evini ilin bütün fəsillərində turistlərə kirayə verir. O, dövlət tərəfindən müəyyən avadanlıqlarla təmin olunduğunu, əlavə olaraq isə öz hesabına generator və istilik sistemi quraşdırdığını deyir.
Firuz İsmayılovun sözlərinə görə, evin günlük kirayə qiyməti mövsümdən asılı olaraq 40–70 manat arasında dəyişir. Hazırda isə qonaqların gecələmək üçün əsasən 50 manat ödədiklərini bildirir.
Kənd evlərində qalan turistlər yerli sakinlərdən alma, qoz, toyuq və digər kənd təsərrüfatı məhsulları da alırlar. Bu, ev sahibləri ilə yanaşı, kənddə təsərrüfatla məşğul olan digər ailələr üçün də əlavə qazanc imkanı yaradır.
Ekspertlər hesab edirlər ki, kənd evlərinin turistlərə kirayə verilməsi regionlarda iqtisadi fəallığın artmasına, yerli məhsulların satışının genişlənməsinə və kənddən şəhərə miqrasiyanın azalmasına töhfə verə bilər.
Bununla yanaşı, ev sahiblərinin təhlükəsizlik qaydalarına əməl etməsi və kirayə şərtlərini müqavilə ilə rəsmiləşdirməsi vacib sayılır. Müqavilədə evin hansı müddətə və hansı qiymətə kirayəyə verildiyi, eləcə də əmlakın vəziyyəti və digər şərtlər göstərilməlidir.
Kənd turizminin davamlı inkişafı üçün təbiətin qorunması, tullantıların düzgün idarə edilməsi və kəndlərin tarixi-mədəni simasının saxlanılması da mühüm əhəmiyyət daşıyır. Mənbə: Apa.аz
