Oğuz və Qəbələ rayonlarında yaşayan ləzgilərin şifahi xalq yaradıcılığı nümunələri toplanaraq sistemləşdirilib və elmi dövriyyəyə daxil edilib.
AMEA Folklor İnstitutunun "Azsaylı xalqların folkloru" seriyasının VIII kitabı olan "Oğuz-Qəbələ bölgəsinin ləzgi folkloru" nəşr olunub.
Kitabda bölgənin etnik-mədəni xüsusiyyətləri, ləzgilərin məskunlaşdığı ərazilər, dil və adət-ənənələri barədə məlumatlarla yanaşı, yerli sakinlərdən toplanmış folklor nümunələri də yer alıb. Materiallar janr və məzmun xüsusiyyətlərinə görə sistemləşdirilib.
Nəşrin sonunda folklor nümunələrini danışan şəxslər və tərcüməçilər haqqında məlumatlar, eləcə də bölgənin milli müxtəlifliyini əks etdirən fotoşəkillər təqdim olunub. Seriyada ilk dəfə olaraq tərcüməçi-mütəxəssislərin, Vətən uğrunda döyüşmüş qəhrəmanların və qazilərin fotolarına da yer verilib.
Kitab ləzgi folklorunun qorunması və araşdırılması, eləcə də Azərbaycanın etnik-mədəni müxtəlifliyinin öyrənilməsi baxımından əhəmiyyətli mənbə hesab olunur.
Mənbə: Azərtac
