Bakı-Quba-Rusiya Federasiyası ilə dövlət sərhədi avtomobil yolu istifadəyə verildiyi gündən bəri bir sıra səbəblərdən etirazlarla qarşılanıb. Bu barədə ShimalNews 17 fevral tarixində “Ölkə.az”a istinadən məlumat verir.
Başlıca olaraq narazılıq müəyyən olunan tariflərin olduqca yüksək olması, digər tərəfdən isə ödənişli yolda müəyyən sürət hədlərinin tətbiq olunması ilə bağlıdır.
Mövzu ilə bağlı nəqliyyat eksperti İlqar Hüseynli fikirlərini söyləyib:
“Ümumiyyətlə, Quba istiqamətində istifadəyə verilən ödənişli yolla bağlı bir sıra narazılıqlar var. Birinci narazılıq tariflərin yüksək olması ilə bağlıdır. Hətta dünən millət vəkili Vahid Əhmədov da bu yolda qiymətlərin baha olmasını dilə gətirdi. Həqiqətən də bu yoldan istifadə edənlər üçün çox yüksək məbləğdir.
Digər tərəfdən ödənişli yolun yaxınlığından keçən köhnə yol dağılıb və sıradan çıxıb. Bu isə Quba və Xaçmaz istiqamətində hərəkət edən insanlar üçün ciddi problemlər yaradır. Sürət həddi dünyanın istənilən avtobanında mövcuddur. Amma nəzərə almaq lazımdır ki, Azərbaycanda istifadə olunan avtomobillərin əksəriyyəti işlənmiş və istismar müddəti başa çatmağa yaxınlaşan maşınlardır. Buna görə də nəqliyyat vasitəsinin maksimal sürəti ciddi qəzalara gətirib çıxara bilər. Bu səbəbdən sürətin müəyyən həddə qədər məhdudlaşdırılması məqsədəuyğun hesab olunur.
Amma digər magistrallarda olduğu kimi, saatda 110 km/saat və daha aşağı sürət tətbiq olunursa, bu bir növ ödənişli yoldan istifadə edən vətəndaşların hüquqlarının pozulmasıdır. Çünki insanlar sürətlə hərəkət etmək məqsədilə o yola görə ödəniş edirlər. Buna görə də ödənişli yolda kəskin məhdudlaşdırıcı sürət həddinin olmasını qəbul etmək olmaz. Bundan əlavə, yolun girişində sürət hədləri ilə bağlı məlumatverici nəqliyyat nişanları qoyulmalıdır”.
