İsmayıllının Təzəkənd kəndində bir qrup sakin uzun illərdir ki, yolsuzluqdan əziyyət çəkir. Bu haqda ShimalNews 22 fevral tarixində “Kanal S”-ə istinadən məlumat verir.
Sakinlər iddia edirlər ki, onların gediş-gəlişi üçün nəzərdə tutulan yolu həmkəndliləri zəbt ediblər. Avtomobillər burada hərəkət edə bilmir. Digər tərəfdən yanğınsöndürən, təcili tibbi yardım maşınları da yolun bərbad olması səbəbindən vaxtında ünvana çatmaqda çətinlik çəkir. Aidiyyəti qurumlara müraciətlər isə bir nəticə vermir.
Təzəkənd bələdiyyəsindən məsələ ilə bağlı açıqlama verilib:
“Həmin bu hissə torpaq sahələri islahat komissiyasının xətti ilə verilən torpaq sahələridir. Tərəfimizdən və İcra Hakimiyyəti tərəfindən bu məsələlərə baxış keçirmək üçün nümayəndələr gəliblər. Biz də bunun araşdırılması ilə dəfələrlə məşğul olmuşuq. Burada, təəssüflər olsun ki, bu torpaq sahələri bir-birinə sıx yerləşdiyinə görə hal-hazırkı vəziyyətdə torpaq sahəsinin ayrılması mümkünsüz olub. Amma biz yeni elektron xəritələrin gəlməsini gözləyirik. Bəlkə də bu torpaqların vəziyyətinə uyğun olaraq, bu məsələləri müəyyən şəraitdə yaratmaq mümkün oldu. Burada texnikalar işləyir, xahişlə onlara müraciət etmişik ki, bu yolların hamarlanması məsələləri var. Sadəcə qış mövsümü ilə əlaqədar texnikalar buradan uzaqlaşdığına görə indi gəlmələri mümkün deyil. Amma bu yaxınlarda burada hamarlanma işləri aparılacaq”.
[video width="1280" height="720" mp4="https://shimal.news/storage/photos/2024/02/Tazakandin-kohna-yol-problemi-Kanal-S-Xabar_1.mp4"][/video]
