Xaçmazda yüksək patogen quş qripi xəstəliyindən qorumaq məqsədilə monitorinq keçirilib. Bu barədə ShimalNews 25 yanvar tarixində AQTA-ya istinadən məlumat verir.
Yoxlama rayon ərazisində fəaliyyət göstərən sənaye əsaslı quşçuluq müəssisəsində aparılıb. Burada quşların laborator müayinəsinin aparılması üçün diaqnostik nümunələr götürülüb, həmçinin təsərrüfatlara ümumi baxış keçirilib.
Vəhşi və ev quşları müayinələrinin və ümumi epizootoloji müşahidələrin təhlili nəticəsində quş qripi xəstəliyinin törədicisinə və xəstəliyə şübhəli klinik əlamətləri olan quşa rast gəlinməyib. Ev quşlarından götürülmüş diaqnostik nümunələr Nyukasl xəstəliyinə görə də müayinə edilib və yoluxmaya şübhəli hala rast gəlinməyib.
