Quba Rayon Mədəniyyət Mərkəzində 20 Yanvar faciəsinin ildönümünə həsr edilən dəyirmi masa keçirilib. Bu haqda ShimalNews 20 yanvar tarixində məlumat verir.
Tədbirdə şəhid ailələri, ziyalılar, mədəniyyət işçiləri iştirak ediblər. Mərkəzin direktoru Ramiz Ramazanov tədbir iştirakçılarına paytaxt Bakı ilə videobağlantı təqdim edib. 20 Yanvar hadisələrində enerji bloku partladılarkən orada olmuş, həmin illərdə Azərbaycan Dövlət Televiziyasının əməkdaşı olan Əməkdar jurnalist Rafiq Səməndər videobağlantı vasitəsilə həmin vaxt baş verən hadisələrdən danışıb.
Yanvar faciəsi günlərində keçmiş Lenin, indiki Sabunçu rayonunun Polis İdarəsində ictimai təhlükəsizlik bölməsinin rəisi olmuş sabiq polis əməkdaşı Sadıq Hacıyev o qanlı günlərdə polis əməkdaşlarının olduqca təhlükəli şəraitdə xidmət etmələrindən danışıb.
