İsmayıllının İvanovka kəndində şəhid Etibar Şirinovun adını daşıyan küçənin açılışı olub. Bu haqda ShimalNews 10 noyabr tarixində İsmayıllı Rayon İcra Hakimiyyətinə istinadən məlumat verir.
Bu gün, şəhidin anım günündə onun adı doğulub böyüdüyü küçəyə verilib. Açılış mərasimində hüquq-mühafizə orqanları, ictimaiyyət nümayəndələri, şəhidin ailə üzvləri, şəhid ailələri və kənd sakinləri iştirak ediblər.
Daha sonra şəhidin məzarı ziyarət olunub, gülqoyma mərasimi keçirilib, ruhuna dualar oxunub. Qeyd olunub ki, şəhid Etibar Şirinov torpaqlarımızın azadlığı uğrunda son damla qanına kimi vuruşaraq qəhrəmancasına şəhid olub:
“Şəhidlər qanları, canları ilə xalqımıza Qələbə sevincini yaşatdılar. Biz onlara hər zaman borcluyuq. Şəhidlər hər zaman xalqımızın qəlbində yaşayacaqdır. Azərbaycanda şəhid ailələri Ali Baş Komandan Cənab İlham Əliyevin diqqət və qayğısı ilə əhatə olunub”.
Şəhidin ailə üzvləri onlara göstərilən diqqət və qayğıya görə ölkə rəhbərinə minnətdarlıqlarını bildiriblər.
Mərasim məktəblilərin ifasında vətənpərvərlik mövzusunda şeirlərlə davam edib.
