İsmayıllı rayonunda yaz-yay suvarma mövsümü üçün hazırlıq işi yekunlaşmaq üzrədir. Bu barədə ShimalNews 28 mart tarixində Azərbaycan Meliorasiya və Su Təsərrüfatı ASC-yə istinadən xəbər verir.
Bu il suvarma kanallarının 32.000 kub.m-i, çay məcralarının isə 60.000 kub.m-i lildən təmizlənib. Hazırda bu istiqamətdə işlər davam etməkdədir.
Su itkisinin qarşısını almaq məqsədilə kanallar beton üzlüyə alınır, hidrotexniki qurğular, hidrometrik postlar və subartezian quyuları cari təmir olunur.
Eləcə də rayon ərazisində Aşıqbayramlı yeqanə iri su anbarıdır. Onun tutumu 3.5 milyon kub.m-dir. Onun vasitəsilə Göyçay Suvarma Sistemləri İdarəsinin balansındakı tutumu 18 milyon kub.m olan Yekəxana su anbarının doldurulması təmin edilir.
Bundan başqa, 2023-cü ildə rayonun Hacıhətəmli, Qalagah, Mücəftəran, Tinglik, Diyallı və Qubaxəlilli kəndlərində yeni subartezian quyularının qazılması nəzərdə tutulur.
