Xaçmaz şəhərində ər arvadını döyüb.
Hadisə Dərbənd küçəsində ər-arvadın kirayə yaşadığı mənzildə baş verib.
1972-ci il təvəllüdlü Kamran (ad şərtidir – red.) ailə-məişət zəminində yaranan mübahisə zamanı arvadı Könülə (ad şərtidir – red.) şillə və yumruqla zərbələr endirib.
Daha sonra evdəki 70-80 santimetr uzunluğunda plastik boru ilə qadının sol qol və ayaq nahiyələrinə vurub.
Məhkəmədə Kamran törətdiyi əməli etiraf edib. O bildirib ki, mübahisə təxminən 7-8 dəqiqə davam edib və hadisə zamanı onların üç azyaşlı övladı həyətdə olub.
Zərərçəkmiş Könül isə ərinin telefonla qardaşı ilə danışmasına etiraz etdiyini və bundan sonra mübahisə yarandığını deyib. O da həyat yoldaşının əvvəlcə onu yumruq və şillə ilə, daha sonra plastik boru ilə vurduğunu bildirib.
Məhkəmə zamanı tərəflərin barışdığı məlum olub. Könül ərinə qarşı şikayət və tələbinin olmadığını bildirib.
Xaçmaz Rayon Məhkəməsinin hökmü ilə tərəflərin barışması nəzərə alınaraq Kamran Cinayət Məcəlləsinin 73.2-ci maddəsinə əsasən cinayət məsuliyyətindən azad edilib.
Cinayət işi üzrə icraata bəraətverici əsaslar olmadan xitam verilib.
