Siyəzən rayonunda baş verən bıçaqlanma hadisəsi ilə bağlı məhkəmə hökmü elan olunub.
Shimal.News xəbər verir ki, 2000-ci il təvəllüdlü Emin 2025-ci il martın 30-da yaşadığı kənd ərazisində, "məktəbin yanı" adlanan yerdə həmkəndlisi Samirlə mübahisə edib. Mübahisəyə səbəb tərəflərin birgə istifadə etdikləri su xətti ilə bağlı yaranmış narazılıq olub.
Hadisədən bir gün sonra Emin Samirlə görüşmək məqsədilə Siyəzən rayonunun Daşlı Çalğan kəndi ərazisində yerləşən "Boyağlı dərə" adlanan yerə gedib. Tərəflər arasında yenidən mübahisə yaranıb və bu zaman Emin üzərində olan ov bıçağı ilə Samirə bədəninin müxtəlif nahiyələrindən xəsarətlər yetirib.
İstintaq zamanı Emin ona elan olunmuş ittiham üzrə özünü təqsirli bilib və hadisənin mübahisə zəminində baş verdiyini deyib.
Sumqayıt Ağır Cinayətlər Məhkəməsinin hökmü ilə Emin Cinayət Məcəlləsinin 126.1-ci maddəsi (qəsdən sağlamlığa ağır zərər vurma) ilə təqsirli bilinərək 3 il müddətinə azadlıqdan məhrum edilib.
Onun barəsində Cinayət Məcəlləsinin 228.5-ci maddəsi ilə aparılan cinayət təqibinə isə xitam verilib.
Qeyd: adlar şərtidir.
